Хайырлы жыл болгъанды

Элбрус районну Байзуллаланы Юсюпню атын жюрютген олимпиада резервли спорт школунда былтыр грек-рим тутушуудан бла спорт гимнастикадан бёлюмле ишлегендиле. Алада жараулагъа 370-ден аслам башха-башха жыл санда сабийле бла абадан спортчула жюрюйдюле. Секциялагъа энди келгенлени алгъа башланнган, ызы бла уа жарау этиу бёлюмлеге жибередиле. Усталыкъларын ёсдюрюп, сынам жыйгъанланы уа бийик спорт усталыкъ къауумлада сакълайдыла. Жылны ичинде юйретиуню онжети тренер бардыргъандыла.

Кеси заманларында спорт школну Кёнделенде бла Быллымда бёлюмлери ачылгъандыла. Ол а элледе жаш тёлюге грек-рим тутушуу бла кюреширге онг бергенди, ала да тюрлю-тюрлю даражалы эришиуледе ахшы кёрюмдюле болдура башлагъандыла.

Алгъа жылладача, былтыр да спорт школгъа жетишимли болгъанды. Аны келечилери 49 эришиуге – чемпионатлагъа, биринчиликлеге, жер-жерли эм халкъла аралы турнирлеге – къатышхандыла, алада кёп майдал да къытхандыла. Эм уллу жетишимле бла атын Локияланы Жамболат айтдыргъанды, ол Россейни Суздальда ётген чемпионатында кюмюш майдалны алгъанды, Къазанда Спортну жай тюрлюлеринден битеукъырал спартакиадада, Совет Союзну Жигити М.А. Аксёновну хурметине аталып къуралгъан халкъла аралы эришиуде эм къарыулу гёжефлени араларында саугъа жерлеге чыкъгъанды. Аслан Толов Тырныауузда Байзуллаланы Ю.К. бла Мирзойланы Х.Т. хурметлерине аталгъан битеуроссей эришиуде хорлагъанды, Сургутда  Социализм Урунууну Жигити Фармат Салмановну хурметине жораланнган турнирде ючюнчю жерни алгъанды. 

Жаш умутландыргъан спортчула, усталыкъларын ёсдюрюп, аслам округ эм битеукъырал эришиуде хорламлары бла къууандыргъандыла. Юлгюге, Лукияланы Руслан Россейни 18 жыллары толмагъан спортчуларыны араларында чемпионатында «кюмюшню» къытханды, Кацийланы Абдурахман жер-жерли округну чемпионатында хорлагъанды, Махийланы Азрет-Али Ара федерал округну биринчилигинде «алтынны» алгъанды. Даражалы эришиуледе ахшы кёрюмдюле Джаппуланы Ислам, Чеченланы Амаль, Бапиналаны Къурман, Жашууланы Хасан, Зариф Минасов, Хапаланы Ислам, Шауаланы Исса, Отарланы Омар болдургъандыла. Кеслерин иги жанындан Малкъарланы Омар, Тохаланы Альберт, Жеттеланы Омар, Урчукъланы Къурман, Балаланы Алий, Отарланы Залим, Къулчаланы Марат, Тёппеланы Жандар эм башхала кёргюзтгендиле.  

Спорт гимнастиканы бёлюмюнде жетишимлени юслеринден айтханда, мында жарау этгенле къарыуларын ёсдюргенден, чыныкъгъандан сора да, эришиулеге къатышырча да болгъандыла. Мында умутландыргъан спортчуладан бири Бэлла Губашиевады, ол биринчи абадан разрядда сынашады.  

Жыл сайын школда бийик квалификациялы спортчуланы санына да къошула барады. Былтыр Россейни спортуну устасы деген ат Махийланы Азрет-Алиге берилгенди. Спортну устасына нормативни Кацийланы Абдурахман да толтургъанды. Зариф Минасов, Жашууланы Хасан,  Тёппеланы Жандар, Джаппуланы Таулан, Ёзденланы Заурбек спортну устасына кандидатла болгъандыла, асламлы разрядланы 186 гёжеф алгъандыла. Юч гёжеф – Локияланы Жамболат бла Руслан, Джаппуланы Ислам – къыралны жыйымдыкъ командасына киредиле.

Бусагъатда жарау этгенлени араларында спортну халкъла аралы бир устасы, спортну юч устасы, эки жюзден асламысыны асламлы разрядлары барды. Быллай бийик кёрюмдюле учрежденияда сынамлы тренерле ишлегенлерини хайырынданды. Россейни сыйлы тренери – школну директору Локияланы Юрий, Хапаланы Аслан, Ачабайланы Музафар, Балаланы Алим, Ёзденланы Мухтар, Башийланы Махмуд (грек-рим тутушуу), Наталья Губашиева (спорт гимнастика) – ала барысы да гёжефлени юйретиуге, аланы жетишимли болурларына къарыуларын, билимлерин да аямайдыла. Учрежденияда, бийик усталыкълы спорчтуланы хазырлагъандан тышында, физкультура-саулукъ кючлеу, юйретиу иш да бардырылады.