Декретге ата чыгъаргъа боллукъмуду?

Арт заманда сабийге къарагъанлары ючюн эр кишиле декрет  отпуска алгъанлары бла байламлы болумла аслам тюбейдиле. Аны къалай алыргъа боллугъун РФ-ни ФСС-ни къырал жумушла эм социальный коммуникацияла жаны бла департаментинде ангылатхандыла.

Анда белгилегенлерича, декрет бла сабийге къарагъаны ючюн берилген отпускаланы бир бирден айыра билирге керекди. Декрет – ол тиширыу сабийден ауурлугъу болгъаны эм сабий тапханы ючюн ишден эркин этилген кезиудю. Эр кишиге аны берир амал жокъду. Алай сабийге къарагъаны ючюн отпусканы ол да алаллыкъды. Аны бла, кертиси бла да, артдан-артха кёпле хайырланадыла, бу болум асламысында ананы хакъы атаныкъыдан эсе кёп болгъан юйюрледе тюбейди.  

Сабийге къарагъаны ючюн отпусканы аммасы, аппасы, бир башха жууугъу неда опекуну алаллыкъдыла. Быллай отпускну саулай неда кесеклеге юлешип алыргъа да жарайды. Аны талай амал бла юлеширге болады. Сёз ючюн, биринчи жылны отпускагъа ана барады, экинчи жылда – ата, амма неда башхала.

Ана бла тенг ата да пособие алыргъа эркинди. Сабийге къарагъаны бла байламлы ахча алыр ючюн, ол иш бла жалчытханнга заявление жазаргъа, анга сабий туугъаныны юсюнден шагъатлыкъ къагъытны бла ананы ишлеген неда окъугъан жеринден справканы къошаргъа керекди. Справкада ана ата бла бирге сабийге къарап отпускада болмагъаныны эм аны ючюн пособие алмагъаныны юсюнден жазылыргъа да тийишлиди. Ана бир жерде ишлемей эсе, социальный къорууланыу органдан ол пособие алмагъаныны юсюнден справканы келтирирге керекди.