Билимин ёз жерибизде хайырланыр муратлыды

Алгъаракълада  КъМР-ни Саулукъ сакълау министерствосу саугъалагъанланы арасында Элсюерланы Танзиля да барды. Ол бюгюнлюкде Къабарты-Малкъар къырал университетни Медицина факультетини ординатурасын  бошагъанды.

Аны бла бирге уа Нальчикни ючюнчю номерли поликлиникасында участкалы терапевт болуп ишлейди. Ведомстволу министерствону атындан Сыйлы грамотагъа уа – ковид-19 жангы инфекция жайылгъан кезиуде жамауатны саулугъуна салгъан къыйыны ючюн тийишли болгъанды.

Танзиля ишге жангыдан кирген заманнга пандемия болум тюшюп, кеси къарагъан участкада 1800-ден аслам адамны халын билгенлей, болушлукъ тийишлилеге мычымай жетгенлей турургъа керек болгъанды.

Анча инсанны арасында уа, къарар адамлары болмай, жангыз кеслери тургъан уллайгъанла да бардыла. Врач къыз а урушну ветеранларыны юйдегилери болгъан эки тиширыугъа да жарсыгъанды, бюгюнлюкде да къайгъыргъанлай турады.

Аланы бирине – 95, бирсисине уа 98 жыл толгъанды. Айхай да, адам кереклидиле. Алай эсе да, не жумушларын да телефон бла Элсюерланы къызларына сёлешип айталгъанларына ыразыдыла. Ол а алагъа, амалсыз болуп тургъан башхалагъа да болушлугъун аямайды, кёллерин кётюрюрге кюрешеди.

Пандемияны кезиуюнде абадан тёлюню келечилерини арасында госпитальгъа баралмагъанла да болуп, алагъа юйлеринде къараргъа тюшгенди. Бирин жокълагъынчы бирсисине да барыргъа тюшюп, участкалы врач, алагъа дарман бла бакъгъанындан сора да, кёл этдиргенлей тургъанды. Аны ючюн сюедиле таулу къызны пациентлери. Келирин сакълагъанлай да турадыла.

Алыкъа урунуу жолунда  алай уллу сынамы жокъ эсе да, ол бу ызны нек сайлагъанын биледи. «Саусузлагъа мен болушлукъ этмесем, ким болушурукъду да?» - деген акъылгъа бёленип, жамауатдан ыразылыкъ да табады.

Танзиля эм ариу эллерибизден биринде – Огъары Малкъарда – ёсгенди. Мында Уммайланы Мухажир атлы биринчи номерли школну «бешлеге» тауусуп, ол жыл окъуна КъМКъУ-ну медицина факультетини «багъыу иш» бёлюмюне киргенди.

Ыннасы КъМР-ни Сыйлы устазы Элсюерланы Аминат Алихановнаны къолунда ёсе, ол окъургъа ючжыллыкъчыкълай юйреннгенди, мектепге уа беш жылында баргъанды. Аммасы бла атасы Хусейни китапха къаллай магъана бергенлерин кёре, орус классиканы ол кезиуден бери да жаратады. Алай эсе да, илляулары бла ойнай туруп, ол алагъа багъаргъа кюрешгенин – «уколла» этип, «дарманла» бергенин да айтып, кюледи.

«Заманынг къалай болса да, бёркюнгю алай кий» деген нарт сёзюбюзню да эсгере, бюгюннгю жаш тёлю кесини къабыргъасын жашаугъа аны излемине тийишлиликде жарашдыргъан ышанны тюзге санагъанын да айтады. Аны бла бирге уа адет-тёрелерибизни унутмай, таматаланы хурметлегенлерин да.

Ангылайбыз, медицина факультетде окъургъа тынч болмагъанын. Алай эсе да, Танзиля студент кезиуюнде волонтёрлукъ бла тири кюрешгенди. Конференциялагъа къатышханды, поликлиникалада врачлагъа болушлукъ да этгенди. Алай бла уа инфекциялы ауруулагъа бакъгъан жанына жюреги бегирек тартханын ангылап, ординатураны ол ызда сайлагъанды.

Бюгюнлюкде  кеси ишлеп тургъан поликлиникада участкалы терапевт кереклисин билгенинде да, ары экили бола да турмай, арсарсыз баргъанды. Окъууун да андан ары ёсдюрюр муратлыды. КъМКъУ-ну аспирантурасыны «Жамауатны саулугъу эмда профилактика» ызында билим алыр умуту барды.

Бюгюнлюкде жаш тёлю тыш къыраллы тиллени билиу – ол шёндюгю жашауну излеми болгъанын да толусунлай ангылайды. Элсюерланы къызлары да ингилизчагъа юйрениуню мектепде окъугъан жылларындан бери да тюз кёреди. «Ингилиз тилни школасына» жюрюйдю. Медицина жаны бла бу тилде аслам магъаналы зат басмаланыучусун эсгертип, кеси ингилизча иги билсе, алагъа да тюшюнюрге тынч боллугъуна ишексизлигин ангылатады.

Окъургъа сюйгеннге бизни университетде хар онг да болгъанын, мында ишлерин тынгылы билген, жаш тёлюню билимни жолуна салалгъан преподавательле барлыкъларын черте, терапиядан кафедраны башчысы Рина Арамисовагъа, патологиялы физиологиядан юйретген, инфекциялы аурууланы юслеринден ангылатхан, бирси ызладан тюшюндюргенлени барысына да ыразылыгъын айтады.

Ушакъ нёгерим  студент кезиуню, жашлыкъны кеслерини энчиликлери болгъанларын чертеди. Болсада, заманны бошуна оздурмай, артда урунуу жолну башлагъанда, къыйналмазча, билим алыргъа, усталыкъны жашырынлыкъларына тюшюнюрге тийишлисин белгилейди. Кеси уа къайда окъуса да, сынамын, ангылауун да ёз жерибизде хайырланып, жамауатны саулугъун игилендирирге жангы онгла, мадарла излер муратлыды.