Саусуз бла тургъаннга больничный къалай саналады?

Мектеплеге, сабий садлагъа жюрюген сабийле терк-терк ауруйдула, аны бла байламлы ата-аналагъагъа да ишден къалыргъа тюшеди. Алагъа больничный къаллай бирге берилгенини юсюнден къыралны страхование службасындан айтадыла.

Алай бла больничныйни болжалы сабийни жыл санына эм къаллай бирге къыйын ауругъанына кёре тергеледи. Ол багъыу кёп заманны керек эсе, ишлемегенлерини юсюнден къагъытны юйюрню башха-башха членлерине берирге да жарайды. Бала амбулатор багъыуда эсе, биринчи он кюнде анга къарагъаннга хакъ страховой стажына кёре тергеледи. Андан сора заманда хакъ айлыгъыны орта эсебине кёре къуралады. Сабий стационарда эсе уа, ахча битеу ауругъан кезиуюнде анга къарагъан атаны не ананы страховой стажына кёре тёленеди.

Ана эки жылны сабийден ауурлугъу болуп неда сабий тапханы бла байламлы отпускада тургъан эсе, ауругъан балагъа къарагъаны ючюн пособие ары дери ишлеген жылларында алгъан хагъыны ёлчемине кёре саналады. Сабий амбулатор багъыуда тургъан кезиуде доктор 15 кюннге больничный (ауругъанны саулугъун экинчи кере тинтгинчиге дери) берирге болады. Ол болжалны созууну юсюнден оноуну уа  медицина организацияны врачларыны комиссиясы этеди.

Сабий анга къарагъан адамны жыл сайын берилген тёленнген отпускуну (адам хакъ тёленмеген отпуск алса да) кезиуюнде ауругъан эсе уа, анга къарагъаны ючюн ахча тёленирик тюйюлдю. Нек дегенде ол кезиуде къарагъан адам алайсыз да ишлемейди. Айтылгъаныча, жети жылы толмагъан сабийге къарагъаннга ол амбулатор неда стационар халда багъылгъан битеу заманнга, алай жылгъа ол 60 кюнден кёп болургъа жарамайды (бир-бирде больничныйле 90 кюннге дери да берилиучюдюле). 7-15-жыллыкъ бла тургъаннга - стационарда бирге жатхан хар кезиу ючюн, алай жылгъа 45 кюнден кёпге угъай. 15-18-жыллыкъ сабий эм юйюрден ауругъан башха адамла ючюн - амбулаторияда хар ауругъаны сайын 7 кюннге дери, алай жылгъа 30 кюнден кёпге угъай. 18 жылы толмагъан сакъат сабий бла тургъаннга - багъыу бардырылгъан битеу кезиуге, алай жылгъа 120 кюнден кёпге угъай. 18 жылы толмагъан ВИЧ-и болгъан сабийге къарагъаны ючюн - стационарда тургъан битеу заманы ючюн. 18 жылы толмагъан рак аурууу болгъан сабий бла уа битеу керекли заманны турургъа жарарыкъды.