Эл мюлкден хапарла

Терек бахчалыкълада  кезиулю ишле башланнгандыла

Къабарты-Малкъарны терек бахчалыкъларында,  къыш кезиу болгъанына  да къарамай,  тийишли ишле тамамланадыла. Ол санда тереклени  керексиз бутакъларын бла чырпыларын кесип кюрешедиле. Белгилисича, терекни  чагъарыгъы эм тирлик берлиги да  ол къалай этилгенине кёре боллукъду.

Бюгюнлюкде республика аслам  терек бахчалыкълары бла  беш алчы регионну тизмесине киреди. Шимал Кавказстаны эсеплерине кёре, былтыр регионда терек бахчалыкълагъа  24,6 минг гектар жетгенди. Андан 17 минг гектар тирлик бергенледиле. Аны 58 проценти неда 14,3 минг гектары биригиулеге эм 10,3 минг гектары да энчи иеликлеге  жетеди.

Фермерле болушлукъгъа – 7,2 миллиондан аслам  сом

Былтыр Къабарты-Малкъарда фермерлеге  билеклик этген  системагъа эм эл мюлк  кооперацияны айнытыргъа 72,5 миллион сом бёлюннгенди.

«Гитче эм орта предпринимательствону  акселерациясы» регион эм «Гитче эм орта предпринимательлеге  эм энчи бир тюрлю иш бла кюрешгенлеге   билеклик этиу» миллет проектлеге кёре 72,5 миллион бёлюннгенди. Андан федерал бюджетге 71,8 миллион сом жетеди,  0,7 миллион сомну да   республика кесинден къошханды.

Сагъынылгъан ахчадан «Агростап»  конкурсну чеклеринде  жыйырма элчи фермер мюлкге 53,4 миллион сом чакълы грант  берилгенди. Андан сора да,  тёрт эл мюлк кооператив  ишлерин айнытырча  16,7 миллион сом субсидия къоллу болгъандыла.

Гитче эм орта бизнесни къурау эм айнытыу жаны бла энчи предпринимательлеге бла биригиулеге информация-эсгертиу эм  методология болушлукъ тапдыргъан    «Эл мюлк кооперациягъа  эм фермерлеге билеклик этиу жаны бла регион арагъа»  2,4 миллион сом жетгенди.

Мирзеулюк нартюх  142 минг гектаргъа чачыллыкъды

Быйыл Къабарты-Малкъарда кюзлюклеге аслам жер бёлюннгени ючюн  жазлыкъ  сабанлыкълагъа 220 минг гектар чакълы  жетерикди.  Хар замандача, кёбюсюнде мирзеулюк эм къудору битимле чачыллыкъдыла. Ол санда нартюх 142 мингден аслам гектарда себилликди, неда былтырдан эсе 2,3  процентге кёп. Аны бла бирге быйыл чеплеуге  14 минг гектар бёлюнюрюкдю, ол да былтырдан эсе азды. 

Тахта кёгетле - 16,8 эм картоф да 7 минг гектарда  орнатыллыкъды.  Ол да толусунлай былтыргъы кёрюмдюге келишеди. Мал ашлагъа бёлюннген жерле да, былтырдача, 11,3 минг гектарда ёсдюрюллюкдюле. 

Продукцияны санына танг къошулгъанды

Шимал Кавказстатдан билдиргенлерича, былтыр Къабарты-Малкъарда  эл мюлк продукциядан  77,7 миллиард сом багъасы   чыгъарылгъанды.  Ол буруннгу жыл бл тенглешдиргенде, 110 процентге кёпдю.

Продукцияны танг кесеги неда   58,2 проценти  битимчилик бёлюмге жетеди. Къалгъан  41,8 проценти да  малчылыкъ бла байламлыды.  Эл мюлк производствону  ёсгенини баш сылтауларындан бирлери  жаулу битимледен, тахта кёгетледен, жемишледен бла наныкъладан танг кесек тирлик алыннганы.  Малны, юй къанатлыланы этлеринден,   сютден  эм жумуртхадан  да  аслам чыгъарылгъаныды. 

Бюгюнлюкде эл мюлк продукцияны  28 проценти  биригиулеге  жетеди.

Техника жаз башы ишлеге хазырды

Къабарты-Малкъарда жаз башы кезиулю ишлеге энчи техниканы эм оборудованияны   да асламысы   хазырды.  Жерчиликде  къармашханлагъа  ол магъаналы шартды, нек дегенде иги тирлик алырча тийишли жумушла болжалдан кеч къалмай тамамланыргъа керекдиле.
Арт заманлада эл мюлкледе энчи техникаларын жангыртырча аслам иш бардырылады.  Ол санда буруннгу жылда  аграрчыла – 152, былтыр - 128 эм быйыл 8 трактор, 2 мирзеу оргъан комбайн эм 1 жюклеучю техника къоллу болгъандыла. 

Эл мюлкде уруннганла техниканы лизинг бла алырча амалны да тири

хайырланадыла. Алай бла былтыр мюлклени барысында да лизинг компанияланы себеплиги бла 327 миллион сом багъасы 67 чакълы энчи техника эм оборудование алыннганды.