Жолда къаллай тюрлениуле кийирирге белгиленеди?

Жолда жюрюуню жорукъларына бузукълукъла этгенлени жууапха тартыуну низамына къаллай тюрлениуле кийирирге белгиленнгенини юсюнден   бу къысха статьяда ангылатабыз.

Тазирле

ОСАГО полиси болмай, жолгъа чыкъгъан водительге тазир 800 сомду бюгюнлюкде. Алай Россейни автостраховщиклерини  союзу аны ёлчемин 5 мингнге дери кёбейтирге кереклиси  жанлыдыла. Документни жарашдыргъанланы айтханларына кёре, тазирни ёлчеми ОСАГО полисни багъасындан учуз болмазгъа тийишлиди.

Шёндюгю низамгъа кёре, полисни жарашдырмагъаннга тазир 800 сомду, аны 20 кюнню ичинде тёлегенде уа,  багъасы эки кереге учуз болады. ОСАГО кийирилген 18 жылны ичинде  тазирни ёлчеми   бир кере да алышынмагъанды.

Андан сора да, шошлукъну бузгъанлагъа жууаплылыкъ да къатыланырыкъды. Бюгюнлюкде бу бузукълукъ ючюн тазир 500 сомду, аны да 5 мингнге дери кёбейтирге кереклисин айтадыла. Ол жаны бла законну проекти Къырал Думаны депутатларыны къараууна берилгенди.

 Сёз машиналарыны техника болумларына тюрлениуле кийирип, неда макъамланы асыры къаты ойнатып, уллу таууш этген кезиулени юсюнден барады. Законопроектде субъектлеге быллай бузукълукъла ючюн административ жууаплылыкъны, тазирни ёлчемин да тохташдырыргъа эркинлик берилгенди.

ЛДПР-ни фракциясыны депутатлары мобилизация бла аскерге чакъырылгъанлагъа жолда жюрюуню жорукъларына бузукълукъла ючюн жууаплылыкъгъа амнистия тохташдырыуну юсюнден законну проектин хазырлагъандыла. Сёз женгил бузукълукъланы юсюнден барады. Сёзге, эсирип, жолгъа чыкъгъанла, неда медицина тинтиуледен ётерге унамагъанла жууаплылыкъдан эркин этиллик тюйюлдюле.

Проект алыкъа сюзюлмегенди, ол къабыл кёрюлсе, мобилизация бла аскерде къуллукъ этген 318 минг адам тазирлени тёлемезге эркин боллукъдула.

 Аурууланы юсюнден шартла

ГИБДД-гъа водительлени саулукъларыны юслеринден шартла белгили этилликдиле. Ол жаны бла законну проектин Къырал Думаны депутатлары биринчи окъулууда къабыл кёргендиле. Энди медицина тинтиулени эсеплери саулукъ сакълауда бирикдирилген къырал информация системагъа эмда МВД-гъа белгили этилликдиле.

Алай бла уа ведомстволаны араларында байламлыкъла кючленирикдиле,    саулугъуна  кёре  машинаны жюрютюрге эркин болмагъанланы юслеринден шартла ГИБДД-гъа къысха заманны ичинде ачыкъ этилликдиле. Бюгюнлюкде уа инсан   хар он жылдан медицина тинтиуледен ётюп, машинаны жютюрюрге эркинликни жангыртады. Алай, законопроектни  авторлары айтханларыча, адам саулугъунда заранына да къарамай, праваларыны болжалы бошалгъынчы  машинаны жюрютгенлей турады.

 Низам

Жолда жюрюуню къоркъуусузлугъуну инспекторлары  водительле бла къалай сёлеширге кереклисини жангы низамы хазырланады. Документ федерал власть органлагъа эсгертиуле чыгъарыргъа берилгенди. Жангы низам инспекторланы бла водительлени араларында даулашлы кезиуле сюзюлгенден сора  жарашдырылгъанды.

Терклик

Транспорт министерство жоллада жюрюрге эркин этилген теркликни ёлчеми жаны бла буйрукъ хазырлайды. Бюгюнлюкде, сёзге, трассалада 110 километр барыргъа эркин этилип, алай сунмай 60 километрге дери тынчайыргъа тюшген кесекле бардыла.  Документ ма быллай башхалыкъланы кетериуге бурулупду. Быллай тюрлениуню кереклисини  юсюнден къырал автоинспекторла ахыр он жылны ичинде айтадыла.