Музыка мектеп жангыртылгъанды

Нальчикде Къабарты орамда орналгъан  2-чи номерли Сабий музыка школгъа тынгылы ремонт этилип бошалгъанды.  Ол 1903 жылда ишленнген шахарны  эрттегили мекямларындан бирине саналады.   

Къошакъ билим бериу учрежденияны  таматасы Османланы  Марьяна  айтханнга кёре, мектепге быйыл  алтмыш жыл толлукъду. Ол себепден аны  жангыртылгъанындан  уллу саугъа жокъду.  Ишле «Культура»  миллет проектге кёре бардырылгъандыла. Мекям иги да эски болгъаны ючюн ишлени кезиуюнде кёп чырмаулагъа тюберге тюшгенди. Болсада алгъадан  проектде  белгиленнген жумушла толусунлай тамамланнгандыла.

Подряд организацияны келечилери мекямны  башында къанжалларын, агъач полларын, эшиклерин, ток чыбыкъларын, таза эм кир суу баргъан ызларын алышхандыла. Аны бла бирге танг кесек жылны жабылып тургъан Къабарты орамгъа чыкъан баш эшикни ачхандыла эм  арбазын да айбатландыргъандыла.

Бюгюнлюкде школда фортепиано, къыл къобузда, дауурбасда  эм башха инструментле ойнаргъа  тёрт жюзге жууукъ сабий жюрюйдю.