«Сизни жашау жолугъуз ёсюп келген тёлюге ариу юлгюдю»

Жылны ахырында республиканы социал-экономикасында   жетишимле болдургъанланы къырал саугъалау бла белгилеу ариу тёреге айланнганды. Быйыл да жылны ахыргъы кюнлеринде КъМР-ни Башчысы Казбек Коков  Правительствону юйюнде инсанланы уллу къауумун саугъалагъанды. Аланы арасында белгили артистле, врачла, алимле, экономистле, эл мюлкде уруннганла, устазла, налог органлада бла архив службада ишлегенле бар эдиле. Битеу  да бирге къырал саугъалагъа 64 адам тийишли болгъанды.

Аланы алгъышларгъа КъМР-ни Парламентини башчысы Татьяна Егорова, Правительствону таматасы Мусукланы Алий, федерал инспектор Тимур Макоев, КъМР-ни Башчысыны Администрациясыны таматасы Мухамед Кодзоков да бар эдиле.

 Казбек Коков   быйыл къыралыбызгъа артыкъда магъаналы жыл болгъанын чертгенди тюбешиуню ача. «Быллай кезиуледе Ата журтубузну бюгюннгю эм тамблагъы кюнюне  жууаплы болгъаныбызны, аны сейирлерин сакъларгъа,  сыйларгъа, багъаларгъа борчлу болгъаныбызны ангылайса.  Залда олтургъанланы, республиканы жамауатыны саулай да сезимлери алай болгъанларына ишексизме»,-дегенди Казбек Валерьевич.

Республиканы оноучусу къыралыбызгъа къыйын кезиуде бизни жерлешлерибиз кеслерини инсанлыкъ болчларын толтургъанларын, кишиликни, батырлыкъны юлгюсюн кёргюзтгенлерин да белгилегенди. «Биз аланы жигитликлери бла ёхтемленебиз. Ала къыралны жанындан къайгъырыулукъну сезерча къолдан келгенни этебиз»,-деп къошзханды.

Болсада битеу сынаулагъа къарамай, республика ышаннгылы айныуну кёргюзтгени белгилегенди. Анга уа жыл иги кёрюмдюле бла бошалгъаны да шагъатлыкъ этеди.    Ол санда промышленностьну индекси ёсгенди.  Эл мюлкде продукция кёбейгени бла бирге тахта кёгетлени жарашдырыу эм асырау жаны бла мадарла тамамланнгандыла.   

 Энчи эс инвестиция проектлеге бла регион программалагъа бурулады. Битеу бу мадарла хайыр келтиргендиле: республиканы кеси файдалары ёсгендиле. Регионну оноучусу айтханыча, бу ахча социал борчланы толтуруугъа къоратылгъанды: жылны ичинде  саулукъ сакълау, билим бериу, культура, спорт объектле ишлетилип, хайырланыргъа а берилгендиле.

- Инсанланы  излемлерин жалчытыу жаны бла магъаналы иш  толтурулгъанды. Аланы жашауда бардырыугъа уа РФ-ни Президентини башламчылыгъы бла жарашдырылгъан миллет проектле уллу себеплик этедиле.  Быйыл Къабарты-Малкъарны 100-жыллыгъыны жылыды. Ол тарых магъаналы жумуш жамауатны бирикдиргенди. Къууанч байрамла республикада,  Москвада да бардырылгъандыла. Ала къуралыулу ётгенлери уа республиканы даражасын бютюнда кётюргендиле. Быллай бийиклеге    жетишиуде халкъыбызны иш кёллюлюгюню  уллу себеплик этгенди, ол сада бюгюн бу залда олтургъанланы да,-деп белгилегенди КъМР-ни оноучусу.

Казбек Коков саугъаланнганланы энтта бир кере алгъышлагъанды. «Сизни хар биригиз республиканы айныууна юлюш къошхансыз. Жашау жолугъуз профессионал билимигиз, ёмюрлени теренинден келген тёрелерибизге кертичилик ёсюп келген тёлюге ариу юлгюдю»,-дегенди эмда жыйылгъанлагъа саулукъ, насып, къолайлыкъ, республиканы айнытыуда жангы жетишимле тежегенди.

Ызы бла саугъалау башланнганды. РФ-ни Президентини Указы бла «Боевое братство» битеуроссей жамауат биригиуню республикада бёлюмюню толтуруу комитетини башчысы Владимир Абаноков  «Ата журтну аллында къыйыны ючюн» орденни 2-чи даражалы майдалы бла саугъаланнганды.

Ол кюн инсанланы уллу къаууму КъМР-ни Сыйлы грамотасы бла белгиленнгендиле. Аланы арасында КъМР-ни Парламентини Промышленность, транспорт, связь эм жол мюлк  комитетини башчысы Байдаланы Салих, Архив службаны башчысыны орнубасры Гуртуланы Азамат, Федерал налог службаны КъМР-де Управлениясыны тамата къырал инспектору Мусукаланы Фируза, КъМР-ни транспорт эм жол мюлк министрини орунбасары Улбашланы Ислам, РФ-ни МВД-сыны Элбрус районда бёлюмюню башчысы Шауаланы Арсен эмда Эристауланы   Абдурахман да бардыла.

Ызы  бла   тюрлю-тюрлю сфералада сыйлы атлагъа тийишли болгъанла саугъаланнгандыла. Ол санда Нальчикни 34-чю прогимназиясыны малкъар тилден бла адабиятдан устазы Ёзденланы Мадина «КъМР-ни сыйлы устазы» атха тийишли болгъанды. КъМКъУ-ну къарачай-малкъар филологияны кафедрасыны башчысы Кетенчиланы Мусса уа «КъМР-ни илмусуну сыйлы къуллукъчусу» болгъанды.

«КъМР-ни билим бериуюню сыйлы къуллукъчусу» атха инсанланы уллу къаууму тийишли кёрюлгенди. Аланы арасында КъМКъУ-ну электроника эм цифралы информация технологияла жаны бла кафедраны доценти Гайыланы Дахир да барды. Тау этекледе терек бахчачылыкъны Шимал-Кавказ илму-излем институтуну ректоруну илму жаны бла орунбасарыны къуллугъун толтургъан Баккуланы Жамал а «КъМР-ни эл мюлкюню сыйлы къуллукъчусу» деген ат бла белгиленнгенди.

Чегемде Олимпиалы грек-рим тутушуудан чемпион Мурат Кардановну атын жюрютген спорт школну таматасы Беканланы Хызыр «КъМР-ни физкультурасыны эм спортуну сыйлы къуллукъчусу» деген ат бла саугъаланнганды.

Республиканы сыйлы юристлерини къаууму да кенгергенди. Ол атха тийишли болгъанланы арасында РФ-ни Юстиция министерствосуну КъМР-де Управлениясыны башчысы Кужонланы Жантемир да барды.

Дагъыда  Къбараты-Малкъарны халкъ артистлерини, культураны бла саулукъ сакълауну сыйлы къуллукъчуларыны, КъМР-ни сыйлы врачларыны атлары белгили этилгендиле.  

«Бир журтлулагъа себеплик жаны бла «Ни шагу назад» волонтёр биригиуню республикада бёлюмюню башчысы Байсыланы Темиржан, «Жангы бийиклик» аскер-патриот фондну къоркъуусузлукъ бёлюмюню башчысы Ёзденланы Замир эм башхала КъМР-ни Башчысыны Ыразылыгъына тийишли кёрюлгендиле.

Тикаланы Фатима.