Саулукъ кючлеген, жарау этген ахшы тёрелерибиз

Эрттегили замандан бери спорт бла кюрешиу къуру жаш тёлюню угъай, абаданланы да сюйген ишлери болгъанды. Шёндюгю заманда фитнес-залла, спорт комплексле республикада кёпден-кёп болуп барадыла. Мында жаш адамла кеслерини усталыкъларын ёсдюредиле, даражалы эришиулеге хазырланадыла. Алай спортну болушлугъу бла саулукъларын кючлерге сюйгенле да аз тюйюлдюле.

Къабарты-Малкъарда аслам эс женгил атлетикагъа, эркин тутушуугъа, футболгъа, дзюдогъа, ауур атлетикагъа, боксха, каратэге бериледи. Сёз ючюн, эркин тутушууну юсюнден айтханда, Хасания элде спорт комплексни белгилерчады. Ол 2010 жылда ачылгъанды. Ары бешжыллыкъ сабийледен башлап, уллулагъа дери тутушургъа мингден артыкъ адам жюрюйдю. Бу залдан кёп белгили гёжефле чыкъгъандыла. Аладан бири белгили спортчубуз Мусукаланы Исмайылды.

Ауур атлетиканы айныгъанын да айтырчады. Россейни югунда эм иги зал Тырныаууздады дерге боллукъду. Битеу керекли оборудованиясы, башха онглары бла да ол шёндюгюлю излемлеге келишеди. Жер-жерли штангачыланы жарау этерча алгъадан тынгылы жерлери жокъ эди, стадионну трибунасыны тюбюнде, бир тар жерчикде жарау этип башлагъан эдиле.  Дагъыда арт жылланы кёрюмдюлерин эсге алсакъ, ала бизни къууандырадыла. Жангыз да Аккайланы Хаджи-Мурат Олимпиада оюнланы эки кере призёру болгъаны кёпню юсюнден айтады. Дунияны, Европаны, Россейни кёп чемпиону мындан чыкъгъандыла. Шёндюгю заманда да Тырныауузну ауур атлетика бла кюрешген залында, спортну бу тюрлюсюнден жашланы эм къызланы ичинде Россейни чемпионатларын ётдюредиле. Россейни сыйлы тренери Маккаланы Махтини да энчи белгилерчады.

Къабарты-Малкъарда сакъатлагъа деп да кёп тюрлю секцияла ачылгъандыла. Тарыхда спорт бла кюрешип саулукъларын тюзетген адамланы юлгюлери да аз тюйюлдю. Аланы бийик эсеплери къууандырады.

Алай бла регионда бийик класслы спортчула жарау этгенлери, уста спортчула бизни республикадан чыкъгъанларын белгилерчады. Мындан арысында да республиканы шахарларында, эллеринде да спорт комплекследе ахшы тёреле унутулмазла деп ышанабыз.