Насыпны мурдору – сюймеклик эм кертичилик

Хасанияда  юлгюлюге саналады Ксаналаны Алимни бла Любаны юйюрлери. Ала къадарларын бир этерге таукел болгъанлы 37 жыл толгъанды. Бирге юч сабий ёсдюредиле, туудукълары да бардыла. Алай Алим Хадисович бла Любовь Оюсовна жаланда кеси сабийлерин ариу юйретип къоймай, элли сабийлеге да билим бере келгенли отуз жылдан атлагъанды. Ксана улу устаз болуп 1988 жылдан бери ишлейди. Ол «Къабарты-Малкъарны физкультурасыны сыйлы ишчиси» деген атха да тийишли болгъанды. 
Любовь Оюсовна да 16-чы  номерли школда сабийлеге ана тилден дерсле береди. Аны окъуучулары  тюрлю-тюрлю даражалы олимпиадалада алчы жерлени алып келедиле. Былтыр а Ксаналары,  Нальчик шахарны администрациясы Юйюрню, сюймекликни эм кертичиликни  кюнюне жоралап бардыргъан муниципал конкурсха къатышып,  биринчи жерге бла майдалгъа тийишли болгъандыла.
Аланы тамата жашлары Артур инженер болуп, «Гладиатор» спорт комплексде ишлейди.  Марат а, юридический факультетни бошап,  Тула шахарда  полицияны  школунда окъуйду. 
Кёп хасаниячы сабийледеча, менде да Любовь Оюсовнаны  къыйыны уллуду. Тилин, халкъын да сыйлай билген устазны эллилери, тенглери да хурметин кёредиле. Бюгюн ол мени  ушакъ нёгеримди.
– Любовь Оюсовна, устазлыкъны кесигизми огъесе адам айтыпмы сайлагъансыз?
–Тёртюнчю классха барып башлагъанымда, бизни школгъа малкъар тилден бла литературадан устазыбызгъа къарап, аныча болургъа сюйгенме. Устазыбыз игиден, дерслеге сейирибизни ёсдюргенден туугъанды мени жюрегимде  ол сюймеклик. Андан башха бир усталыкъгъа эс бёлмегенме. Юйде да артыкъ ыразы болмай эдиле, алай кесими сайлауума бир кере да чогъож болмагъанма. Мен сагъыш этгеннге кёре, адам кеси сайлау этсе, ишлеген да тынчыракъ болады. 
–  Школ къаллай бир заманыгъызны алады? 
– Юйде ананы жумушларыны, борчларыны саны жокъду. Аладан бош болгъанлай, жукъугъа бёлюннген замандан башха кезиуде, сабийлени дефтерлери къолумдан кетмейдиле. Школ жашаууму магъанасыды десем,  ётюрюк айтмам.
–  Шёндюгю заманда сабийле телефонла эм башха технологияла бла аслам хайырланып, кеси тилибизде  осалыракъ сёлешгенлери эсленемиди дерследе? 
– Уллуракъ сабийле игирекдиле тилге гитчеледен эсе. Орус тилде жомакълагъа асыры кёп къарагъанда кёреме аны сылтауун. «Алан тил» деген сайтдан  жомакъланы салып, сейирсиндирирге да кюрешеме, бек сюйюп къарайдыла. Абаданыракъ бола баргъанлары бла, ана тилде аслам сёлешип башлагъанлары бек къууандырады. Тамата классладан сабийле кёп болмай ана тилден республикалы олимпиаданы шахар кезиуюнде алчы жерлени алгъандыла. Аллай шартла бек къууандырадыла.  
– Юйюрлени араларында баргъан конкурсха къалай къатышханыгъызны юсюнден айтсагъыз эди.
– Бизни юйюрюбюз устазлыкъ иш бла тёлюден-тёлюге кюреше келгени себепли, эришиуге школну атындан  къатышхан эдик. Къайын атам да устаз болуп кёп жылланы ишлегенди. Сора уллу къызыбыз да бу ызны сайлагъанды. Ол себепден эришиуде бизни биринчи жерге тийишли кёргенлери бла бек ёхтемленебиз. Элибизни, мектебибизни да атларын иги бла айтдырыу а бек сыйлы жумушду. Бизге бу жууаплы ишни ышаннганлагъа да ыразыма.
- Любовь Оюсовна, байрам кюнлени аллында халкъыбызгъа къаллай алгъыш айтыргъа сюесиз?
– Мамыр жашау сакълансын, хар юйюрню да монглугъу ёссюн! Жашау бир кесек къыйыныракъды шёндю, аны себепли хар инсанны да жашаууна жангы жыл бла ахшы тюрлениуле келсинле! Миллетибиз кесини тилин, маданиятын, байлыгъын сакъласын, айнытсын! Сабийле аслам туусунла!
 
 
Холамханланы Алима.
Поделиться: