Мында хар не да бийик даражадады

Бу кюнледе Минги тауну тийресинде  уллу, гитче да бек кёпдюле. Адамла  солургъа, лыжала, чанала бла учаргъа  къыралны кёп жерлеринден, ол санда жууукъ эмда узакъ тыш къыралладан да  келедиле. Ала бери сюйюп,  мында  къонакъбайлыкъ бийик даражада болгъанын билип келедиле. Аланы  сакълап тургъанча, бу кюнлеге дери   жаумай тургъан къар да  кёп жаугъанды.   Жангы жылны аллында Элбрус районну Терс-Къол тийресинде  адам бютюн кёп болуучуду…

Алгъаракълада уа  ишни юсю бла  ары баргъанымда, тёгерекни шошлукъ бийлеп тура эди. Анда-мында бир адам  кёрюнеди. Ала да асламында ол элде жашагъанла. Кюн а асыры къыздыргъандан, кёпле женгил кийинипдиле. Хау, туристле да бар эдиле, алай  болуучусуча кёп угъай.

-Анга да къарамай, къонакъ юйлени бары да  адамладан толупдула. Ала алгъадан окъуна жерлени  алгъандыла. Бусагъатда уа алайды, болсада  тогъуз-он кюнден мында тырнакъ басар жер боллукъ тюйюлдю. Бизни къонакъ юйде он отоу барды. Алада экеу-экеу, ючеу, ол санда юйюрлери бла келгенле да турурча жерле бардыла,-дейди  юйню иеси Жаппуланы Зайнаф.

Баш иеси Жаппуланы Зейтун бла  аны юй бийчеси Зайнаф къонакъ юй не къадар тап болурча ишлегендиле. Хар номеринде   къол-бет жуугъан жер, жукъа телевизор, ванна эмда душевой кабинала, кондиционер, кабель телевидение, Интернет байламлыкъ да  бардыла. Сёзсюз, сапынны, шампуньну, дагъыда алагъа ушаш затланы да къошаргъа боллукъду. Аламат жарыкъ, жылы отоулада хар зат да  юйдечады.  Мында болум Тюркде беш жулдузлу къонакъ юйледен кем тюйюлдю, деригим окъуна келеди. Аны ашханасында  шинтикле, столла да  агъачдан сейирлик ишленнгендиле. Аланы барын да къолдан устала этгендиле. Бир-бир шинтиклени башларында уа  Минги тауну  агъачдан ишленнген суратын кёрюрге боллукъду. Залдагъы от жагъа да кёп къалмай таулу от жагъагъа ушай келеди. Къабыргъала сары гыйы ташдан къаланнганлары уа  ашхананы бютюн  айбат этедиле. Бу къонакъ юйде  экология жаны бла таза болурча  не гитче зат да эсге алыннганды. Бек башы уа, Жаппуланы Зайнаф  бла Къабардокъланы Мадина хазырлагъан  аш-суу да  татымлы эмда татыулуду. Аны  ашханагъа ауузланыргъа келген адамгъа ала  бек иги ресторанлада ишлегенле сукъланырча  жарашдырып келтиредиле. Тёгерекде-башда тазалыкъны уа айтмай окъуна къояйыкъ.

Экеулен бу къонакъ юйде  бир сутканы туруп, эрттенликде ауузланып кетерча багъасы да артыкъ уллу тюйюлдю.  Баям, аны ючюн болур, кёпле бу къонакъ юйде тохтаргъа излеп келедиле.

Сёзсюз,  сервис,  бек биринчи шартды. Алай ол бийик даражада болуп,  къонакъбайланы уа мангылай жарыкълары болмаса, ары  экинчи адам къайтып келирге унарыкъ тюйюлдю. Мен ары баргъан кюн тюбеген тиширыу да  бу къонакъ юйде экинчи кере тохтагъанын  билдиргенди. «Была манга эгечлеримден  кем болмайдыла, алай жарыкъ тюбейдиле кимге да, аны ючюн а  бери дагъыда къайтып келлигинг келеди»,-дегенди.

Къонакъ юй жангыды, анда ишлеген команда да жашды. Ол айныуну жолундады деп окъуна айтыргъа боллукъду. Анга да къарамай, ала солургъа келгенлеге бийик даражада тюбейдиле. Ма аны ючюн экинчи да къайтып келирге сюедиле адамла. Дагъыда къонакъ юй Азау таладан узакъ тюйюлдю.Ол да бек ахшы шартды. Адам белгиленнген сагъатындан алгъаракъ келсе да, аны сакълатып турмайдыла, анга да бир амалны терк окъуна  табадыла. Аберилерин сакъларгъа сюйгенлеге да  онг къурайдыла.

«Январь айда, солуу кюнледе келип солуп, таза хауаны да татып кетерге жарагъан бек  аламат жерди бу. Къонакъ юйню иеси Зайнаф бизге бек жарыкъ тюбегенди. Мында болум да жюрегинге хошлукъ береди, машина бла келгенлеге уа транспортну салыр жер да эркинди.  Ингирликде уа чыкъ да элни ичи бла ёрге, энишге  айлан. Тёгерекде мекямланы жарытхан  тюрсюнлю чыракъла  тийрени бютюн айбат этедиле. Мында кёкде жулдузла да жууукъдула», дейдиле ол тийреде солургъа келгенле.

 

Поделиться: