Ал жанында – къыйын жашау болумгъа тюшгенлеге къайгъырыу

Озгъан  орта кюн КъМР-ни Жарыкъландырыу эм илму  министерствосунда Акъылбалыкъ болмагъанланы ишлери жаны бла комиссияны  кезиулю  жыйылыуу болгъанды. Аны Правительствону Председателини орунбасары Марат Хубиев  ётдюргенди. Акъылбалыкъ болмагъанлагъа, къыйын жашау болумгъа тюшгенлеге болушлукъгъа къаллай мадарла этилгенлерини юсюнден  а  КъМР-ни  урунуу эмда социал къоруулау министри Асанланы Алим билдиргенди.

Ол башчылыкъ этген министерство къыйын  жашау болумгъа тюшгенлени халларын бла сылтауларын тинтиу, актла жарашдырыу, юйюрлеге, сабийлеге да  тынгылы социал болушлукъну къурау,  аллай юйюрлеге  жамауатда жерлерин табаргъа себеплик этиу жаны бла борчланы эмда кёп башха социал жумушланы тамамлайды.

Тинтиуле ачыкълагъаннга кёре,  2022 жылда 332 юйюр къыйын жашау болумгъа тюшгенди. Асламында ала  кёп сабийли, толу  болмагъан эмда къолайсыз юйюрледиле. Аланы къырал себеплик бла жалчытыу социал къоруулау учрежденияланы боюнларына салыныпды. Акъылбалыкъ болмагъанла бла уа  «Намыс»  социал-реабилитация  эмда Урван районда  юйюрлеге эм сабийлеге  социал болушлукъ этиу  жаны бла республикалы аралада ишлейдиле.

Социал учрежденияла  «Жашаугъа наркотиксиз» деген ат бла акцияла бардырадыла. Аланы кезиулеринде наркологла лекцияла, консультацияла, ушакъла  бардырадыла, наркотикле, ичги, тютюн да къаллай хата салгъанларыны юсюнден видеофильмле кёргюзтедиле, оюнла къурайдыла.

Республикада 2009 жылдан бери  сабийлеге  эмда юйюрлеге психолог-педагогика жаны бла  болушлукъ этген 10 бёлюм ишлейди.  Быйыл психолог-педагог болушлукъну  1378 юйюр эмда 4915  сабий алгъандыла.

-Къыйын болумгъа тюшген юйюрлеге эмда сабийлеге  болушлукъ этген фондну  телефону (8-800-2000-122) дайым ишлейди. Анга ким да сёлешип, болушлукъ сураргъа боллукъду. Быйыл анга 391 адам сёлешгенди,- деп билдиргенди докладчы.

Ызы бла КъМР-ни жарыкъландырыу эмда илму министрини орунбасары Мокъаланы Ачемез сёлешгенди эмда ёксюз, къарар адамлары болмай къалгъан сабийлеге интернатдан сора къалай къайгъырылгъаныны юсюнден билдиргенди.  Ол айтханыча, аллайлагъа деп  энчи ара барды. Анда ала бир жылны ичинде  жашайдыла, хакъсыз аш-суу бла жалчытылынадыла, усталыкъларына, хунерликлерине кёре иш да бериледи,  окъургъа сюйген да аллай онг табады.

Ёксюз эмда къарар адамлары болмай къалгъан сабийлени жашау журтла бла жалчытыу иш да андан ары бардырылады.

Министрни орунбасары кемчиликлени юслеринден да сагъынмай къоймагъанды. Аланы кетериу жаны бла мадарла этиле тургъанларына да ышандыргъанды. 

КъМР-ни Правительствосунда Акъылбалыкъ болмагъанланы ишлери жаны бла комиссияны келир заманнга борчларыны юслеринден а  аны секретары  Елена Мисостова билдиргенди.

КъМР-де  Сабйлени эркинликлери жаны бла уполномоченный Светлана Тлинова да кесини оюмун айтханды. Законнга сыйынмагъанланы, сабийлерине сансыз къарагъанланы   ата-ана эркинликлерин мычымай  сыйырыргъа кереклисин чертгенди. Тийишли министерстволагъа бла ведомстволагъа  ёксюз, къарар адамлары болмай къалгъан сабийле бла ишлеуню кючлендирирге, ала сюдлюк болгъунчу мадарла этерге керек болгъанларын эсгертгенди.

Марат Хубиев а юйюрле эмда  сабийле бла ишлеуню игилендирир ючюн  бийик усталыкълары, уллу сынаулары да болгъан специалистледен  комиссия къурауну дурус кёргенди.

Суратлада: жыйылыугъа къатышханла;  Асанланы Алим сёлешеди, президиум; Мокъаланы Ачемез сёлешеди, президиум.