Курортну айнытыугъа уллу кюч салынырыкъды

Тау-лыжа курортну  инфраструктурасын айнытырча  «Шимал Кавказны айнытыу жаны бла институт Кавказ.РФ» тийишли  резидентле бла келишим къурарыкъды.  Конкурсла бла айырылгъан  биригиуле Азау талада  къонакъ юйле,  ресторанла эм  спортобъектле ишлерикдиле.  

Инвесторланы проектлерин, резидент къаллай болургъа кереклисин, жерни ортакъгъа алыу бла байламлы жумушланы юсюнден да  «Кавказ.РФ.» биригиуню сайтында табаргъа боллукъду. 

Проектлени бардырыргъа  азау талада 4,8 гектар чакълы бирде эки  бош жер барды. Резидентле алада туризм жаны бла  инфраструктура къураргъа – эм азындан 650 адамгъа къонакъ юйле сюерге  эм тёгерек-башны да айбатландырыргъа   керекдиле.

 - Инвесторла  Элбрусда  кафеле,  ресторанла, спорт  объектле ишлерикдиле. Къурулуш бла байламлы излемле алгъадан   белгиленнгендиле.  Эм биринчи ала  планда болгъаныча бир архитектура сыфатха келиширге тийишлидиле,-  деп билдиргенди  Кавказ.РФ  биригиуню таматасы Андрей Юмшанов.

Биринчи  резидентле жаш башына  белгили боллукъдула.  Аны бла бирге Гара Башында къонакъ юйле эм къараучу майданла  ишлеген  эки резидентни заявкалары бла  юч миллиард сом багъасына  проектлеге  къарала турады.   

Бюгюнлюкде жылны узуну лыжалада учаргъа жарагъан  курортда «Кавказ.РФ» биригиуню башчылыгъы бла онжети  километр  лыжа  трассала бла  юч гандол  канат жол ишленнгенди.  Лыжа жолла иги да бийикде орналгъанлары себепли,  алада   ноябрьден башлап  июнь айгъа дери къар эримей турады.

Ярмаркалагъа аламат комплекс

«Эльбрус»  курортда  жангы излемлеге келишген  ярмарка  комплекс ачылгъанды.  Анда эски базарда ишлеген предпринимательле кеслерини продукцияларын  сатарыкъдыла.   Жангы павильонланы уллулугъу  4,5 минг квадрат метрге жетеди эм алгъыннгы  базардан сегиз кереге уллуду.   Аны сатыу-алыу точкаларындан тышында,   байрамла ётдюрюча сахнасы,  администрациясы, санитария жаны бла жерлери  бардыла, объект жылынырча  мадар да этилгенди. Бюгюнлюкде жангы  комплексде   предпринимательлеге жерле берилгендиле.

Жангы излемлеге келишген  ярмарка  „Эльбрус“ курортну  инфраструктурасын айнытыу жаны бла  этилген проектледен бириди.  Курортда жашау журтла бир архитектура план бла ишленирге керекдиле. Аны бла бирге гитче эм орта бизнесде къармашханланы  эркинликлери бузулмазча да аслам эс буруллукъду.