Сабийлени саугъала бла къууандыргъандыла

Жангы жылны аллында Терк районну  Дейское элини администрациясыны, жер-жерли  самоуправленияны,  Маданият юйню,  библиотеканы эм амбулаторияны келечилери  чекленнген онглары болгъан  эм  энчи операцияда борчларын  толтургъан аскерчилени сабийлерин   жокълап  саугъала бергендиле. Байрамны аллында быллай жандауурлукъну бардырыу  ахшы тёреге айланнганды. Бу жол аны хайыры бла эки жыйырмадан аслам  гитчеге саугъала берирге онг табылгъанды. 

Къонакъла  бла бирге къызыл тонлу  Къар Аппа эм  Къар Къызны келгенине сабийле бютюн бек къууаннгандыла.  Жомакъдан жигитле игиликге, тамашалыкъгъа эм Жангы жылны огъурлулугъуна да ийнандырыргъа себеплик этгендиле. 

- Быллай акцияны къурагъанлагъа,   сабийлерибизни къууандыргъанлагъа    ата-аналаны атындан  ыразылыгъымы  билдирирге сюеме,- деп къошханды  аналадан бири.

 

Магометланы Сулейман.
Поделиться: