Совет къыралны жюзжыллыгъын кенг белгилегендиле

Россейни Коммунист партиясыны КъМР-де регион бёлюмю СССР къуралгъанлы 100-жыл толгъанын  къууанчлы халда белгилегенди. Байрамгъа партияны районлада бёлюмлерини келечилери жыйылгъандыла. Таматаланы, тёреде болуучусуча, пионерле да алгъышлагъандыла.

Жыйылыу Къырал концерт залда бардырылгъанды. Ары келгенлеге уа Нальчикни эстрада-духовой оркестри тюбегенди. Ол а совет заманлада бютюнда кенг белгили, халкъ сюйген макъамланы сокъгъандыла. Къонакълагъа КъМР-ни Коллекционерлерини союзу  СССР-ни белгилеринден кёрмюч да къурагъанды.

Пленумну Коммунист партияны КъМР-де регион бёлюмюню таматасы, КъМР-ни Парламентини депутатыты Борис Паштов ачханды. Ол жюз жыл мындан алгъа 23 декабрьде Советлени 10-чу   съезди  ишин башлагъанын, анда уа тарых магъаналы оноула этилгенлерин эсгертгенди.

- Бюгюннгю пленум да ол магъаналы ишге жораланнганды. Съездде Совет Социалист Республикаланы Союзун къурауну юсюнден оноу чыгъарылгъанды. Артха къалгъан къыралны Ленин кесини акъылы, оюмлулугъу бла айныуну жолуна салгъанды, аны чачылыудан сакълагъанды. Большевикле халкъланы къарындашлыкъларыны, тенгликлерини мурдорунда жангы къырал къурагъандыла. Сайлагъан жол тюз болгъанын заман кёргюзтгенди.  Совет халкъ граждан эм Уллу Ата журт урушлада   къыйынлыкъладан, сынауладан ётгенди,-дегенди Борис Султанович.

Ол дагъыда СССР-ни чачылыууну юсюнден оноу Россейге келтирген хатаны, алай коммунистле социализмни ниетлерине кертичилей къалгъанларын да айтханды.

Пленумда «Халкъ властьны совет сынауу: КПРФ-ни керти демократия, социал айныу эм халкъланы шуёхлукълары ючюн кюреши» деген докладны тарых илмуланы доктору, КъМКъУ-ну этнология, КъМР-ни халкъларыны тарыхы эм журналистика кафедрасыны доценти Артур Кажаров этгенди.

Юбилейге жоралап, КПРФ «СССР-ге 100 жыл» майдалны чыгъаргъанды. Ол кюн аны бла коммунистлени уллу къаууму саугъаланнганды. Тёреде болгъаныча, партиягъа энди киргенлени билетлери берилгендиле.

Тюбешиу керти да байрам халда баргъанды. Залда жыйылгъанлагъа сейир концерт программа къуралгъанды. Музыка театрны солисти Рустам Абаноков, КъМР-ни сыйлы артистлери Мызыланы Аубекир бла Ауес Зеушев халкъ сюйген жырланы айтхандыла. Жыйылгъанланы коммунист Мухамед Шетов да сейир этдиргенди жыр айтып.

Тикаланы Фатима.
Поделиться: