Эл мюлкден ахшы хапарла

Мирзеуден бла къудорудан тирлик къууандырады

Шимал-Кавказстатны эсеплерине кёре, быйыл Къабарты-Малкъарда эл мюлк производительлени барысы да  мирзеу бла къудору битимледен 1052 минг тонна тирлик жыйгъандыла.   Орта эсеп бла алып айтханда, бир гектардан 59,5  центнер чыкъгъанды. Былтыр бу заман бла тенглешдиргенде ол 5,3 процентге кёпдю.

Мирзеуню асламысы, хар замандача, нартюхге жетеди, андан быйыл  824,7 минг тонна орулгъанды неда бир гектардан  73,2 центнер.

Малчылыкъда ёсюм эсленеди

Шимал-Кавказ статистика управленияны эсеплерине кёре, быйыл  Къабарты-Малкъарны  мюлклерини барында да малланы бла юй къанатлыланы этинден  91,7 минг тонна сатылгъанды. Сютню юсюнден айтханда,  494,6 минг тонна сауулгъанды эм  жумуртхаладан да 192,5 миллиону алыннганды.

Бюгюнлюкде республикада малчылыкъ бла байламлы продукцияны танг кесеги энчи иеликлеге жетеди. Сёз ючюн, этден - 41, сютден - 69 эм жумуртхаладан да 83,3 процентини бу категория жалчытады.

  Элчи фермер мюлкле бла  энчи предпринимательле да   малла бла юй къанатлыланы этинден  союлмагъан ауурлукъда   27,9 процент продукция чыгъаргъандыла. Ол санда сютден - 15,9 эм жумуртхаладан да 0,7 процент алагъа  жетеди.

Саулай алып айтханда, быйыл эл мюлк  организациялада  малланы бла юй къанатлыланы этинден (союлмагъан ауурлукъда) - 28,3, сютден -75,3 эм жумуртхаладан да 30,8 процент къошумчулукъ этилгенди.