Эсли болургъа чакъыргъандыла

Нальчикни полициячылары кибер аманлыкъчылагъа къажау акция ётдюргендиле. Анга Россейни МВД-сыны Нальчик шахар округда управлениясыны Жамауат советини келечиси Игорь Кобозев да къатышханды.

Акция шёндюгюлю информация-телекоммуникация технологияланы хайырланыу бла хыйлачылыкъланы саны ёсгенлери бла байламлы эди. Бу жол аны Нальчикни 400-жыллыкъны  майданында ётдюргендиле.   

Участковый, полицияны капитаны Артур Баев, акъылбалыкъ болмагъанланы ишлери жаны бла инспектор полицияны тамата лейтенанты Джаримас Таашев эм Управленияны Жамауат советини келечиси Игорь Кобазев юйретиу ушакъланы кезиуюнде телефон аманлыкъчыланы къалай ачыкъларгъа керек болгъанын эслерине салгъандыла. Полициячыла нальчикчилеге да, къонакълагъа да аманлыкъчыла асламында къаллай амалла  бла хайырланнганларын  билдиргендиле. Ала гражданланы эслерин телефон бла танымагъан адамлары бла сёлешгенде кеслерини эмда  банк карталарыны юслеринден информацияны ачыкъларгъа жарамагъанына бёлгендиле. Ызы бла  жашаудан бир къауум юлгю да келтиргендиле.

 Арт заманда хыйлачыла абаданлагъа сёлешип, аланы жууукълары къыйын болумгъа тюшгенин айтып,  аны къутхарырча мычымай ахча жиберирге керекди деп алдайдыла. Абадан тёлю  асламында терк алданып къалады. Аллай заманлада мычымай телефонну салып, кимни юсюнден хапар бара эсе да анга сёлеширге керекди, деп чертгендиле полициячыла.

Ахырында, битеу акциягъа къатышханлагъа, хыйлачыладан къалай бла къутулургъа керек болгъан иформация бла китапчыкъла юлешгендиле, деп билдиредиле КъМР-да МВД-ны пресс-службасындан