«Муратым Олимпиадагъа тюшергеди»

Халкъыбызны атын айтдыргъан спортчуларыбыздан бири дзюдочу Мисирланы Исмайылды.  Кеси ауурлугъунда (66кг.) ол бюгюнлюкде Россейни жыйымдыкъ командасында биринчи тизмедеди. Мисир улу кёп даражалы турнирле бла чемпионатлада хорлай келеди. Ол къатышхан ахыр эришиу август айда бардырылгъан Битеуроссей спартакиада эди. Анда таулу жаш, «алтын» ючюн сермешде алчылыкъны жибермей, чемпион атха тийишли болгъанды.

Исмайылгъа жети жыл болгъанда аны анасы биринчи кере залгъа келтиргенди. Ол спортзалны аланы юйлеринден узакъ болмай орналгъаны ючюн сайлагъан эдиле. Алай анда жаланда дзюдо бла кюреше эдиле. Спортха бергенлерини баш сылтауу да орамлада ёрге-энишге жумушсуз айланып турмасын дегенде эди. Жаш а тутхан ызында быллай жетишимлеге жетер деб а бириуню да эсинде болмагъанды.

Бюгюнлюкде спортчуну юйдегилери ол узакъгъа кетсе бек жарсыйдыла, тансыкъ да боладыла. Алай ол аны жашауу, иши болгъанын, аны бла кесине хайыр этгенин  ангылап, кёл этедиле.

- Хар спортчу да эришиуню аллында бек жарсыйды, къоркъгъан да этеди. Алай къоркъан сопернигинден угъай, жаланда хорлатыргъа къоркъады, аны уллу айыпха санап. Алай бир талай замандан бирледе ол жарсыу кетеди, башхаланы уа битеу жашаулары алай ётеди, - дейди мени ушакъ нёгерим.

 Тутушханда жан жанындан болушлукъ келмезлигин билип, хар нени да кесинг этерге керек болгъанын ангылайса.  Сагъышларынгы, халинги да контрольда тутурагъа юйренирге керексе. Сёз ючюн, Исмайыл, татамиге чыгъып, аллымдагъыны жагъасындан бир тутсам, битеу жарсыуларымы унутуп къояма, дейди. Сермешден сора башха бир затны юсюнден сагъыш этмей, тутушуугъа битеу эсинги да, къарыуунгу да берирге керекди. Алай болса, тутушургъа чыкъан заманда бир чырмау да боллукъ тюйюлдю. 

Исмайылны биринчи тренери Магомед Емкужев болгъанды. Ол аны сабийлигинден  школну бошагъынчы жарау этдирип тургъанды. Бек къаты адам эди деп эсгереди аны спортчу. Школдан сора Мисир улу Краснодарда кюрешип башлагъанды. Алай юйге келсе анга кирмей къалмайды. Хар заманда да анга бек жарыкъ тюбеп, керек сёз табады.  Хар тренерни да сабийлеге кесини энчи ызы болады. Бирин сюйюп, башхасын а сюймегенден тюйюлдю ол. Сабийлеге жарсыгъандан, хар тренер да кесин тюрлю-тюрлю кёргюзтюрге боллукъду.

 Краснодаргъа кёчюп, бир жыл озгъанлай, Мисир улу къыралны жыйымдыкъ командасына тюшгенди. Анда уа бир жылгъа 300 кюн сборлада турургъа керек болады. Ол къалгъан эки айны уа жылгъа созаргъа кюрешеди, бир келгенде бир эки ыйыкъгъа, бирде бир беш алты кюннге келип алай-алай этеме.

Спорт болмаса жаланда ма бу зат бла кюреширик эдим дегени да жокъду, алай медицинаны жаратханы сезимлиди. Не заманда да врачлагъа башха тюррлю болгъанма.  Ол бек къыйын иш болгъанын ангылап. Адамны жашауун сакълагъанлары эм бир тюрлю халат жиберирге эркинликлери болмагъанын да ангылайса. 

 Кесини сабийи профессионал халда кюрешсе сюерик тюйюл эди ол. Андан эсе бир иги врач болса, неда кеси сюйген бир башха усталыкъ сайласа ыразы боллугъун билдиргенди спортчу.  Кесин спортха толусунлай берип, ол къалай къыйын болгъанын керген адам сабийине аллай жашау тежерикди деп айталмайды.

- Республикада бек иги дзюдочула бардыла. Аладан бири тренер Шауаланы Ханапийди. Ол жаш тёлюню кёлю бла аламат  хазырлайды. Андан сора Руслан Кимни да белгилерчады. Анда кюрешген сабийле да бек бийик кёрюмдюле болдурадыла.   Башахаланыча мени да баш муратым Олимпиадады. Ол Оюнлагъа тюшюп, хорласам, кесими борчуму толтургъаннга санарыкъма, - дейди Исмайыл.

 Ушакъ нёгерими оюмуна кёре, эм къыйыны муратларынга кертичилей къалыуду. Ичингде от жанмаса муратынгы тас этерге боллукъса.

- Мен алыкъа кесим да бек кеп насийхат кереклиме. Алай, жаш тёлюге бек -биринчиден,  тренерлерине тынгыласала игиди. Залгъа бир келгенден ары юйретгеннге тынгыларгъа керекди. Аман затха юйретирик тюйюлдю. Не заманда да бетигизни тас этмегиз. Алгъа муратларыгъызгъа барыгъыз. Не къыйын болса да, тёзген этигиз. Тарыкъгъан бла къолланы ийип къойгъан бизге келишген зат тюйюлдю, -деп чертгенди ол.

Спортну сайлагъанда бек кёп сюйген затларынгдан къуру къалыргъа тюшеди. Сюйген заманынгда нёгерлеринг бла да айланалмайса, муратынга жетерча кеп кюреширге тюшеди.

Жашауда хар спортчуну да аны къояргъа сюйген заманы да болады. Мисир улуну школну бошап, Краснодар крайгъа кёчген заманында болгъан эди аллай кезиую. Битеу жашауун кеси жеринде жашап, юйюрюню, нёгерлерини ортасында, андан сора уа танымагъан жерге кёчюу къыйын эди анга.

Бюгюнлюкде кёпле социальный сетьлени хайырлана кюрешгенлерине Исмайыл артыкъ жаратмайды. Алай бла кеси страничкала жюрютмейди. Алай сабийле интернетде кёп тийишли спортчуланы кёрюп, аланы ызларындан спортзалгъа тартылгъанларын а жаратады.

Спорт жаны бла муратына жетгенден сора Исмайыл туугъан жерине къайтып жашаргъа сюеди.