Пиротехника хатагъа келтирмезча

Жангы жылны аллында МЧС-ни Къабарты-Малкъарда Баш управлениясыны келечилери пиротехниканы хайырланырдан алгъа къоркъуусузлукъ жаны бла жорукълагъа эс бурурларын жамауатны  эсине салады. Аны юсюнден бизге ведомствону пресс-службасындан билдиргендиле. 

Байрамны  аллында жерлешлерибизден иги кесеги   тюрлю-тюрлю  фейерверкле къоллу болуп  башлагъандыла. Алагъа гарантия берген  энчи тюкенледе алыргъа кереклисине уа аз адам эс бурады. Эшикде сатханладан неда  сатыу-алыу точкалада  белгисизледен алыннганланы баям, сертификатлары боллукъ тюйюлдю.

- Сатыучуну баш борчларындан бири, алычуну пиротехниканы къоркъуусуз хайырланырча, инструкция бла шагъырей этергеди. Андан сора да, аны качестволу болгъанына сертифактны неда  декларацияны кёргюзтюрге керекди.  

- Фейерверкни алгъан заманда эм биринчи аны упаковкасына эс бурургъа тийишлиди.  Аны суу тийген, кесилген, жылтыргъан неда башха бузукълугъу болмазына сакъ болугъуз. Иги эм къоркъуусуз  продукцияны юсюнде производительни   адреси эм телефону да жазылады, (къайсы къыралда этилгенини башхалыгъы жокъду). Андан сора да, пиротехниканы биргесине  инструкция да бериледи,- дейди МЧС-ни  надзор эм профилактика иш жаны бла бёлюмюню  инспектору Алан Дзугулов.

Пиротехниканы хайырланырдан алгъа бу жорукъланы сакъларгъа борчлуду: 

1. Фейерверкни жандырырдан алгъа инструкцияда жазылгъаныча  кенгирек жерни сайларгъа керекди.  Алайда терек, ток чыбыкъ неда башха чырмау саллыкъ зат болмаса игиди.  Аны бла бирге къаты жел урса да бир тюрлю  хата салмазча  жибермесе тапды.  

2. Къараучула къоркъуусуз зонада 30-50 метр чакълы узакълыкъда турсала   тийишлиди. 

3. Эм игиси фейерверкни билген адам жиберседи. Ичип тургъалай а аны бла арталлы да кюреширге жарамайды.

4. Салютну жиберлик адам аны  инструкциясында жазылгъаныча тийишли халда бегитирге эм атылырына неда жанарына хазыр болургъа  борчлуду. 

 5. Жандыргъандан сора пиротехниканы къолда кёп тутаргъа, юсюнде сюелирге  жарамайды. Атдырып бошагъандан сора да, бир къауум заманны къатына бармаса игиди. 

6. Хайырланырдан алгъа  фейерверкни юсюнде инструкциясын окъургъа эринмегиз.

7. Фейерверкни жандыргъандан сора терк окъуна сыртыгъызны буруп узагъыракъгъа  къачаргъа кюрешигиз. 

8. Пиротехниканы атдыргъынчы чачаргъа неда аны къурамын тюрлендирирге  жарамайды. 

Жорукълагъа  уллу кёллюлюк этип, сакълыкъны унутханла кеслерине неда башхалагъа хата салмай къаллыкъ тюйюлдюле. Бютюнда бек сабийлеге кёз-къулакъ болургъа борчлуду.