Кюйдюрюлген газны эсеплери заманында билдирилселе игиди

КъМР-ни Тарифле эмда жашау журтлагъа надзор этиу жаны бла къырал комитетине юйде счётчик бар эсе, газ ючюн къалай тёлерге керекди, деген соруу бла кёпле сёлешедиле. Ведомствода ангылатханларына кёре, РФ-ни Правительствосуну 2008 жылда 21 июльда чыгъарылгъан 549-чу номерли бегимине тийишлиликде, абонент озгъан айда неллай бир газ кюйдюргенин (счётчикге къарап) аны бла жалчытыучу компаниягъа билдирмесе, ол ары дери бир жылны ичинде хайырланнган кёк отлукъну бир айны орта ёлчемине кёре тергелликди. Счётчик орнатылгъанлы жылдан аз озгъан эсе уа – ол кезиуню алып алай.

Юч айны ичинде эсепле энтта да жиберилмей турсала уа, неллай бир газ къоратылгъаны нормативге кёре тергелликди. Ала жангыдан счётчикде кёргюзтюлгеннге кёре этилир ючюн, газны хайырланнган адам, компаниягъа барып, заявление берирге керекди. Ызы бла аны юйюне контролёр келип, счётчикде жазылгъанны эсепге тюшюрлюкдю.

Законда айтылгъаныча, хайырланыучу бла газ бла жалчытыучу компанияны араларында келишимде башха тюрлю жазылып тюйюл эсе, абонент ай сайын приборда кёргюзтюлгенни компаниягъа билдирип турургъа керекди. Аны mrgkbr.ru сайтда энчи кабинетге кирип неда 8-800-100-09-04 телефон номер бла сёлешип тамамларгъа боллукъду.