Чапыракъланы шууулдагъанлары тынчлыкъ, зауукълукъ берип турурча

Бюгюнлюкде Къабарты-Малкъарны агъач мюлкюнде ишлерин сюйген, сынамлары болгъан адамла къармашадыла. Биз аладан бири «Чегем лесничествону» баш агъашчысы Наршауланы Муслим бла учрежденияларыны юсюнден сёлешгенбиз.

Ол бу усталыкъны сабий заманында окъуна сайлагъанын айтады. «Атабыз Сагъыт пенсиягъа кетгинчи Тёбен Чегемни лесхозунда ишлегенди, къарындашларым Алий бла Руслан да лесникле эдиле. Школда окъуй тургъанымлай, атабызгъа болуша, сезон ишлеге къатыша тургъанма. Аскерден къайтханымдан сора мында тракторчу болуп урунуп башлагъанма, артда лесникни орунунда да къармашханма.

Ишлерге Биринчи Чегемге кёчгенимде уа Шимал Осетияда Шимал-Кавказ аралы агъач техникумну «Техник-лесовод» бёлюмюн тауусханма, аны бла бирге Къабарты-Малкъарда СГА-да юристге окъугъанма. Диплом алгъанымдан сора агъач культураланы инженери, ызы бла уа мюлкню инженери болуп ишлегенме. Арт юч жылда районну баш агъашчысыны къуллугъунда урунама», - дейди ол ушагъыбызда.  

Чегем районда агъач 15,190 минг гектарда ёседи. Ол юч участокга бёлюнеди: Чегем - 2 минг гектар, Лячинкъая - 3,288 минг гектар эм  Тёбен Чегемни агъач фондуна 9,9 минг гектардан асламысы киреди. Ишни юсюнден айтсакъ, быланы биринчи борчлары агъачны сакъларгъады эмда ол тозурамазча жумушланы бардырыргъады. Аны бла байламлы жыл сайын этилген затла бардыла. Ол санда от ёчюлтюучю эмда башха машинала тыйгъычсыз жюрюрча, жолланы тап халгъа келтиредиле, къуругъан, чириген тереклени, жерге тюшген бутакъланы кетередиле, кесилген, аугъан терек бар эсе, аланы да белгилейдиле.  

Ёртенни ёчюлтюрча кёлле ишленедиле, жангыртылынадыла. Ахыр онбеш жылны ичинде мында от тюшюп хата салмагъанын да белгилерчады. Жыл сайын он гектарда жангы терекле орнатыладыла, 150 гектарда тапландырыу ишле бардырыладыла, дагъыда аллай бир жерде тинтиуле этиледиле. Санитар болумгъа да аслам эс бурулады мында. Быйыл бу жаны бла тийишли ишле 212,7 гектарда барадыла.

Планнга кёре, МВД-ны, МЧС-ни эмда башха профильли структураланы келечилери бла жылны ичинде, бир-бирде уа айгъа эки, юч кере рейдле къураладыла. Жылны ахырында болумну эсеплегенден сора тындырыллыкъ ишлени планнга тюшюрюп, тийишли жумушланы тамамларча «Каббалклесхозгъа» бередиле.

Муслим айтханнга кёре, бюгюнлюкде бу жаны бла ишлеге чырмау салырча сылтау жокъду. Жангы техника, оборудование болса бек иги эди, алай бирси жерледе да болум былайды. Кадрла жетмегенлери ючюн ишчилеге аслам жумушну тамамларгъа, къыйналыргъа да тюшеди, бютюнда тау жерледе уруннганлагъа. Болсада белгиленнген жорукъладан чыгъаргъа жарамайды. Ол себепден жашла борчларын толтурур ючюн, солуу кюнле излемей, кече-кюн демей къармашадыла.

Белгилисича, агъачха бек уллу къоркъууладан бири, ёртенди. Бютюнда жаз башы бла кюз артында арендаторла  сабанлагъа бла чаллыкълагъа от салгъан кезиуледе. Ол себепден адамла бла ангылатыу-профилактика ишле бардырыладыла. «Жыл сайын тюрлю-тюрлю акцияла къурайбыз. Ол санда 1 сентябрьден 31 октябрьге дери «Живи лес», кюз артында «День посадки леса» деген битеуроссей эмда республикалы акциялагъа тири къатышабыз. Субботниклени къурау да тёреге айланнганды. Бир-бир ишлеге школчула, жамауат да къошуладыла. Сёз ючюн, быйыл беш уллу субботник бардыргъанбыз.

Районну жашиллендириу жаны бла да кючюбюзню аямайбыз. Окъуу учреждениялагъа, организациялагъа терекчикле бла юлкюле беребиз. Битимлени Лескен районда «Къабарты-Малкъарны агъач питомнигинден» алабыз. Аны таматасы Гайыланы Шамиль бизге не заманда да болушургъа угъай демейди», - дейди ушакъ нёгерим.  

Бюгюнлюкде коллективде жыйырма эки адам барды. Аланы араларында жыйырма жылдан аз ишлегенлери жокъду, хар бири да бёлюмню айныууна уллу къыйын салгъандыла. Эрттеден бери уруннганланы сагъына келсек: агъачха къарагъан участковыйле Беппайланы Альберт, Аслан Бесланеев, Башир Хагажеев, болушлукъчулары Сарбашланы Тахир, Муаед Бесланеев, Халиф Кармоков, агъач устала Байчеккуланы Идирис бла Жабелланы Хасан, баш бухгалтер Мызыланы Наныу, болушлукъчусу Сарбашланы Маржан, агъачны сакълау эм къоруулау жаны бла инженер Хасанби Текушев эмда башхала.

Муслим кеси уа профессионал байрамлары бла коллегаларын алгъышлап, алагъа саулукъ, монглукъ, насып тежейди. «Бизге болушлукъ тапдыргъанлары ючюн Чегем районну администрациясыны, МВД-сыны, МЧС-ини  келечилерине эмда башхалагъа учреждениябызны атындан ыразылыгъымы билдирирге сюеме», - деп, алагъа ыспас да этеди.

Курданланы Сулейман.