Мансур биринчи болгъанды

Кёп болмай Зеленокумскда  дзюдодан СКФО-ну биринчилиги ётгенди. Анга къатышханланы араларында Деваланы Мансур да бар эди. Таулу жашчыкъ 2011-2012 жыллада туугъан къауумда эрише, 38кг ауурлукъ категорияда алчылыкъны жибермей, Шимал Кавказда кеси жыл санында бек кючлю болгъанын кёргюзтгенди.

Мансур спортну бу тюлюсю бла кюрешгенли эки жыл да болмайды. Алай тренер Олег Маховда жарау этген спортчуладан бек жетишимлиледен бириди. Дзюдогъа келгинчи ол спортну кёп тюрлюлери бла кюрешип тургъанды.

- Атам мени кёп тюрлю секциялагъа жюрютюп тургъанды. Алай къарындашым спортну бу тюрлюсю бла кюршегени себепли, мен да бери барыргъа бек сюе эдим. Сора мени да ары берирге дегенлеринде болмагъанча къууаннган эдим. Муратым абадан бола баргъаным къадарда чемпионлукъ атны жибермезгеди. Анга уа жаланда эринмей жарау этиу бла жетишир амал барды, - дейди гитче чемпион.