«Элбрус» курортну айнытыргъа - 15,2 миллиард сом

Къабарты-Малкъарда «Эльбрус» тау-лыжа курортну айнытыргъа инвестиция халда 2024 жылгъа дери 15,2 миллиард сом берилликди.  Ол санда  Azimut Hotels къонакъ юй эм уллу проектледен бириди.  Аны къурулушуна 900 миллион сом къоратыллыкъды эм кеси да толусунлай 2026 жылгъа битерге керекди.  Аны юсюнден бизге   РФ-ни Федерация Советини бюджет эм финанс рынокла жаны бла комитетини таматасыны орунбасары, Къабарты-Малкъардан сенатор Улбашланы Мухарбий билдиргенди.

Ол айтханнга кёре, арт жыллада республикагъа келген туристлени санына танг къошулгъаны себепли бирси инфраструктура бла бирге, къонакъ юйлени кёбейтирча да мадар этерге керекди. 

- РФ-ни Правительствосу туризм жаны бла проектлени бардырыргъа грант халда 250 миллион сомдан аслам бёлгенди. Бюгюнлюкде конкурсха алтмыш заявка берилгенди. Аны чеклеринде   кемпингле, модуль эм  гитче отельле ишлер мурат барды,- деп къошханды сенатор.

Жылны узуну ишлеген „Эльбрус“ курортну    инфраструктурасы бла байламлы къауум проект жашауда бардырылады. Сёз ючюн, 800 машина сюелирча жерни къурулушу башланнганды. Тау-лыжа трассала бла  эки канат жол ишлене турадыла. Кир суу саркъырча мадар  этиледи, ол системагъа тёбентин орналгъан  Элбрус эл да къошуллукъду. Аны бла бирге  мында туристлеге тап болурча жангы мардалгъа келишген больница да  ишлене турады. Ачыгъанланы Тырныауузгъа элтмезча,  травматология арасы эм аллергология бёлюмю да боллукъду.

Андан сора да, Чегем районда саулукъну кючлеу жаны бла  «Чегем» лагерьни жангыртыу барады. Бюгюнлюкде талай жангы объект сюелтилиннгенди.   Зольск районда да «Эко-парк», «Долина Нарзанов» туризм комплексле жетишимли  ишлейдиле. Черек районда да  Аушигерде, Огъары чирик кёллени тийресинде, Огъары Малкъарда да эски объектлени жангыртырча эм башхаларын ишлерча мадар этиледи. 

«Эльбрус» курортну айнытыу жаны бла проектле  Кавказ.РФ.  институтну башчылыгъы бла бардырыладыла. Бусагъатда мында  тау лыжалада учарча  трассала эм юч гондол тюрлю  канат жол ишлейдиле. Эсге сала айтсакъ, былтыр  курортда 400 мингден аслам адам солугъанды. Алай бла арт тёрт жылда, орта эсеп бла алып айтханда,  къонакъланы санына 19 процент къошулгъанды. Мындан арысында да ол кёрюмдю жаланда ёсе барлыгъы сакъланады.