Сабийлени дарманла бла жалчытыугъа бюджет фонд жууаплы этилгенди

Аз тюбеген, артыкъда къыйын, жашаугъа къоркъуулу аурууладан къыйналгъан сабийлени дарманла бла «Круг добра» бюджет фонд жалчытырыкъды.  Ол жаны бла тюзетиуле «РФ-де инсанланы саулукъларын сакълауну юсюнден» федерал законнга кийириледиле. Къырал Думаны депутатлары бу кюнледе аны ючюнчю окъулууда къабыл кёргендиле. Ол кючюне 2023 жылда 1 январьдан кирликди.

Законну ангылатыу бёлюмюнде жазылгъаныча,   гемофилия, муковисцидоз, гипофизарный нанизм, Гоше ауруу,   лимфада, къанда онкология,   рассеянный склероз, гемолитико-уремический синдром, артрит, мукополисахаридоз (I, II эм VI тюрлюсю) эм алача башха къыйын, жашаугъа къоркъуулу ауруулары болгъанла, санларындан бири операция бардырылып алышыннганла да дарманла бла   «Круг добра» бюджет фонддан жалчытылынырыкъдыла - 18 жылгъа дери сабийле.   

Андан таматалагъа ахча  бюджетден бёлюнюрюкдю.

 Документде жазылгъаныча, артыкъда багъалы дарманла бла жалчытыу программагъа киргенлени саны ёсгенлей барады, ол санда саусузла дарманланы   заманында ичгенлерини хайырындан, аланы жыл санлары кёбейгени бла да байламлыды ол.  2018-2021 жыллада къыралда программада тургъанланы саны 68,8 мингнге ёсгенди эмда бюгюнлюкде багъалы дарманла бла жалчытылыннганланы  тизмесинде  227,5 мингден аслам саусуз бардыла. Аланы арасында сабийле аслам жерни аладыла.

РФ-ни Президенти 2021 жылда 5 январьда «Жашауларына къоркъуулу ауур, ол санда аз тюбеген (орфанный) аурууладан къыйналгъан сабийлеге болушлукъгъа «Круг добра» фондну къурауну юсюнден»  Указны чыгъаргъанды.  

Анга тийишлиликде, фонд ауур, жашауларына къоркъуулу аурууладан къыйналгъан сабийлеге медицина болушлукъ  бериуню, ахча бёлюуню къураргъа жууаплыды, ол санда тыш къыраллада да. Аны бла бирге фонд аллай сабийлени дарманла, медицина керекле бла жалчытады: РФ-де эсепге салынмагъанла бла да.  Дагъыда реабилитация мадарланы федерал тизмесинде болмагъан жумушланы, техника кереклени тапдырыргъа да керекди.

 

Тикаланы Фатима хазырлагъанды.
Поделиться: