Фабриканы электрокючге излемин жалчытхандыла

«Россети Шимал Кавказ» компания Къабарты-Малкъардан кондитер фабрикаладан бирине къошакъ халда 1,5 мегаватт электрокюч бла жалчытып башлагъанды. Аны бла энди ол производствогъа юч мегаватт ток жибериледи, дегендиле электрокюч компанияны республикада бёлюмюню пресс-службасында.

Бу фабрика бизни республикада ишчи жерле бла жалчытханланы арасында эм уллуладан бирине саналады. Къошакъ электрокюч а анда производство кенгертилгени ючюн изленнгенди.

Къалай-алай болса да, «Каббалкэнергону» специалистлери ол заявканы терк эмда тынгылы тамамлагъандыла. Бу ишни чеклеринде фабриканы электрокюч бла жалчытыуну бютюнда ышаннгылы этгендиле: энди ол ары эки жерден келип турлукъду.

Бизнесге электрокюч инфраструктураны женгил хайырланыр онгла бериуге компанияда бек уллу эс бургъанларын белгилегендиле. Быллай заявкалагъа ала тынгылы къарайдыла, производстволарын сетьлеге къошарча, ол ышаннгылы, качестволу да болурча тап амалла излейдиле.