Мобилизациягъа тюшген предпринимательлени налогла бла онгдуруу

Россей Федерацияны Правительствосуну быйыл 20 октябрьде чыкъгъан 1874 номерли «Мобилизациягъа тюшген инсанлагъа себеплик этиуню юсюнден» бегими бла, аскерге чакъырылгъанланы атларындан отчётла бериу эмда налогла тёлеу жумушланы тийишдирген амалла тохташдырылгъандыла. Аны юсюнден Федерал Налог службаны Къабарты-Малкъарда Управлениясындан билдиргендиле.

Алай бла, налогланы эмда башха тёлеулени, сора дагъыда отчётланы бериуню болжаллары аскерде къуллукъ этген заманнга эмда андан сора талай айгъа дери созуладыла. Аны себепли предприниматель артха къайтып келсе, ол жумушларын тамамларгъа эмда кесини ишин жангыдан башларгъа заманы боллукъду. Аскерде къуллукъ этиу тауусулгъандан сора, ючюнчю айны 28 кюнюне (ол да ары киреди) дери созуп, ма бу тёлеулени берирге боллукъду:

  • налогланы (организация тюшюрген файдагъа налогдан эмда НДФЛ-ден къалгъанланы. Экинчисин налог агент тёлерге борчлуду);
  • тёлеулени (къырал пошлинадан эмда жаныуар дунияда объектлени хайырланыу ючюн тёлеуледен къалгъанланы);
  • страховой тёлеулени (ол санда борчлу халда этилирге керек болгъан пенсия эмда медицина страховкала ючюн);
  • производствода ачыгъандан эмда урунуу бла байламлы аурууладан, кеслери да ол белгиленнген заманнга тюшген (борчлу халда этилирге керек) страховой тёлеуле.

Болжалына салыннган тёлеулени, налогланы эмда сборланы предпринимательле бир кезиуге угъай, кесек-кесек этип, аз-аздан берирге боллукъдула. Алай биринчи тёлеулерин а (болгъанындан алтыдан бирин), ол берилген болжал бошалгъандан сора, аны ызындан келген айны 28 кюнюнден кеч къалмай кёчюрюрге керекди. Андан сора уа ай сайын тенг-тенг этип алай берирге тийишлиди.

Управленияда айтханларына кёре, андан сора налог декларацияланы да кечирек берир амал барды. Жарым мобилизация бошалгъандан неда аскерде къуллукъдан кетгенден сора ма бу къагъытланы бериу болжаллары созуладыла:

  • налог декларацияла (НДС-ден къалгъан бары да);
  • тыш къыралладан организациялагъа файда тёленнгенини эмда тыйылгъан налогланы юсюнден налог тергеуле;
  • НДФЛ-ни ёлчемлерини тергеулери;
  • аванс тёлеулени юсюнден тергеуле;
  • бухгалтер (финанс) отчётла.

Эсигизде болсун, налогланы тёлеуню болжалына салыргъа онг жаланда предпринимательлеге неда организациялагъа угъай, адамланы кеслерине да бериледи. Сёз мында НДФЛ-ни (аны налог агент тёлей эсе, ол ары кирмейди) эмда мюлк ючюн налогну юсюнден барады. Адамла дагъыда валюта контроль этиуню чеклеринде декларацияларын эмда отчёт документлерин да артхаракъ берирге боллукъдула.

Кеслери иш къурагъанларындан сора, профессионал налогну (НПД) тёлерге эркинликлерин тас этгенле, сора НПД амалны сайлагъан предпринимательле, башха налог режимлеге кёчерге неда аладан чыгъаргъа сюйгенлерини юсюнден налог органнга 20 эм 30 кюнден кеч къалмай билдирирге борчлудула. Аскерде къуллукъ этгенлеге аланы болжаллары да созулады.

Энтта да бир жангычылыкъ налог тинтиулени бардырыу бла байламлыды: мобилизациягъа тюшген предпринимательлеге ала бардырыллыкъ тюйюлдюле. Ол санда валюта эмда кассала бла байламлы болгъанла да. Аланы счётларын жабаргъа чек салынады. Актланы эмда тинтиулени эсеплерин, сора дагъыда аланы юслери бла этилген оноуланы къолларына тутдуруу, аладан документле излеу, соруула бардырыу да тыйылады.

Алай НДС декларацияланы тинтиу, къайтарыллыкъ ахчасы болгъан акцизле эмда НДС бла байламлы контроль жумушланы тамамлаугъа уа чек салынырыкъ тюйюлдю. Аны себепли, бузукълукъ табылмаса, налог тёлеучюлеге аллай ахчалары заманында къайтарыллыкъды.

Налогланы, страховой взносланы, процентлени эмда талай башха тюрлю сборланы тёлерге керекди деген къагъытланы жибериу алты айгъа дери болжалына салыныргъа боллукъду.

Налог тёлеучюлеге себепликге ФНС-ни официальный сайтында «Жарым мобилизацияны кезиуюнде налогла салыу» деген бёлюм къуралгъанды. Анда быллай себеплик этиу амалланы юсюнден жик-жиги бла жазылады.

 

 

Улбашланы Мурат хазырлагъанды.
Поделиться: