Борчунг бар эсе,аны берип къутулгъандан игиси жокъду

Алиментлерин тёлемей къутулур мурат этгенле азаймайдыла. Аладан ал бугъартханланы арасында   тиширыула да кёпдюле. Аллайланы  терсликлерине жолукъдургъан амалла да аз тюйюлдюле. Аланы ангылатырын Сюд приставланы федерал  службасыны КъМР-де Управлениясыны  таматасы Бауаланы Каллетни жашы Ахматха тилегенбиз. Бу къуллукъда ол былтыр кюз артындан бери ишлейди.            

- Сабийлерине ахчаны заманында тёлемей, андан  албугъартып айланнганланы ачыкълау эм ала ол борчларындан къутулурча мадарла этиу  бек магъаналы ишлеригизден бири  болгъанын билебиз, аны къалай тамамлагъаныгъызны юсюнден айтсагъыз эди.

-Бизни  баш борчубуз - сюд чыгъаргъан оноуну толтуртургъады, сабийге тёленирге керекли ахча  заманында ананы неда атаны, ыннаны къолуна тюшерча этергеди. Приставла аны магъаналылыгъын бек иги ангылайдыла, ол себепден анга энчи эс бурадыла, алагъа жетген не мадарла бар эселе да, аланы толтурадыла. 

Ол жумуш оналты приставны боюнуна салыннганды. Жылны башындан  бери   ала  13,5 миллион сом  тёленирча этгендиле. Бусагъатда бизде производствода 3924 иш барды. Алиментлерин тёлемез ючюн тюрлю-тюрлю амалла этип айланнганладан  уголовный жууапха  68 адам, административ  жууапха да  311 тартылгъандыла. 2575 адамны уа, борчу уллу болуп, Россей Федерацияны чегинден ётерге эркинлиги сыйырылгъанды. 

- Иш табалмай, бир жерден файда алмай жашагъанлагъа уа не амал?

- Приставла аллайлагъа да къайгъырадыла, оноучула, иеле бла да тюбешедиле, алай бла иш табаргъа болушадыла. Алай, билемисиз, кеслерин къыйнаргъа сюймегенле да аз тюйюлдюле. Ма  ол заманда аллайланы  юйлеринде болгъан ырысхыларын сыйырыргъа тюшеди. Машинасы бар эсе, аны да. Бюгюннге   355 адамгъа ма аллай амалны хайырланыргъа тюшгенди.         2541 адам эки эмда андан да кёп айны тёлемегенледиле. Алагъа бир ненча кере   эсгертиледи да, бирле къулакъ саладыла да,  амалларына кёре аз-аздан бередиле. Алай  артыкъ  ашыкъмагъанла да бардыла, аллайланы борчлары 269 миллион сомгъа жетгенди.

-Сюд приставла алиментлерин тёлерге сюймегенлени жууапха тартыргъа эркинмидиле?

-2016 жылда «Толтуруучу производствону юсюнден»  Федерал законнга кийирилген тюрлениулеге тийишлиликде  адамны борчу он мингден атлады эсе,сюд приставла аны  машина жюрютюрге эркинлигин сыйырыргъа боллукъдула. Жылны башындан бери  аллай амал 1131 адамгъа  хайырланылгъанды. Ол мадар а къыйматлы болгъанды. Андан сора кёпле алиментлерин  терк тёлеп къутулгъандыла. 

Борчларын тёлемегенлери ючюн уголовный жууапха   тартылыргъа боллукъларын да кёпле билмейдиле. Жылны башындан бери   68 адамгъа ол халда мадар этилгенди. 

-Ата неда ана законну биле тургъанлай, андан  къутулур амал этип айлансала уа?

-Ол заманда РФ-ни  Уголовный кодексини 65-чи  статьясы хайырланылады.  Бизде жаланда ол жаны бла ишлегенле бардыла. 

-Бизде алиментледен албугъартханла артыкъда къайда кёпдюле?

-Прохладна районда -  825 адам. Андан сора тизмеде Нальчик келеди – 799, ючюнчю жерни уа Бахсан район алады – 530 адам. Тиширыула да Прохладна районда асламдыла- 138, битеу да республикада уа ала 344 боладыла.

-Жууапха тартыудан башха уа Управление къаллай амалланы хайырланады?

-Тюрлю-тюрлю акцияла бардырабыз.  Сёз ючюн, Сабийлени къоруулауну халкъла аралы кюнюнде «Сюд приставла - гитчелеге» деген акцияны бардырмай къоймайбыз.  Аны мураты -  жамауатны эсин сабийлени эркинликлерине бузукълукъ этгенлеге  бурууду. 

Ахырында айтырыгъым, жайда кёпле тыш къыраллагъа барып солургъа сюедиле да, ары тебирерни аллында   борчлары болгъанларын бла къалгъанларын билгенни хатасы жокъду. Бар эсе уа, аны тёлеп къутулуу бек магъаналыды. Керекли шартланы  Сюд приставланы федерал службасыны   «Толтурулургъа керекли производстволаны  банкы»  деген  сервисинде кёрюрге боллукъду. 

Ушакъны Холаланы Марзият бардыргъанды.
Поделиться: