Агъач мюлкде чынтты уста болурча

Къабарты-Малкъар къырал аграр университетни «Агъач иш» деген бёлюмюню «Терек бахчачылыкъ эмда агъач иш» кафедрасыны башчысы Хусен Назранов, преподавательлери Наталья Цепкова бла Гадийланы Анжела, ала бла бирге уа студентле да, кёп болмай «Агъач питомник» деген къырал учрежденияда болгъандыла. Ала анда тереклени ёсдюрюу бла байламлы дерс бардыргъандыла.

Студентле питомникде производство къалай къуралгъанына къарагъандыла. Учрежденияны агроному Эдуард Канкулов къонакълагъа экскурсия бардыргъанды, предприятияда не бла кюрешгенлерин, алагъа къаллай борчла салыннганын  да туура этгенди. Ызы бла терекчикле ёсдюрюуде, аланы урлукъларын хазырлауда, республиканы агъачларын жангыртыуда жетишимлери бла шагъырейлендиргенди.

Бу сферада энди ишлерик жаш тёлюге терекчикле ёсген жерлени кёргюзтгендиле. Шёндю анда аланы онеки тюрлюсю барды. Учрежденияны специалистлери айтханларына кёре, аланы есюулерине, хазырлылыкъларына кёре айырадыла.

Питомник жыл сайын миллион чакълы бир терекчик жарашдырады. Ала агъачлада жюз гектарны жангыртыргъа эмда республикада организацияланы жер-жерледе жашиллендириу жумушларын толусунлай тындырыргъа жетедиле.

Экскурсияны ахырында питомникни башчысы Гайыланы Шамиль студентлеге насийхат сёзлерин айтханды.

Университетден билдиргенлерича, ала бу учреждение бла кёп жылланы байламлыкъла жюрютедиле. Сагъынылгъан кафедраны келечилери, студентле да анда урлукъла жарашдырыргъа, терекчикле орнатыргъа болушадыла, сынам аладыла.