Токну юсюнден ачыкъ эмда ангылашыныулу ушакъ

Майский шахарны 14-чю номерли орта школунда сабийлеге жай солуу кезиуде электрокючню къоркъуусузлу хайырланыучуну юсюнден дерс бардырылгъанды. Тёртюнчю классны тауусханла бла районну электросетини электромонтёру Виктория Базылева тюбешген эди, деп билдиргендиле «Каббалкэнергону» пресс-службасындан.

«Анача, энергетикча да айтама: токга бек сакъ болугъуз! Жаланда ма алай боллукъду ол сизге юйде, окъууда, солууда да шуёхугъуз», - деп башлагъанды Виктория дерсин. Ол гитчелеге тийишли жорукъланы, къоркъуусузлукъну, электрокюч оборудованияны къатында орнатылгъан белгилени юсюнден кёп хапар айтханды. Школчула бузулгъан приборла, ачыкъ ток ызла нечик уллу хата келтирирге боллукъларын билгендиле, чыпынлагъа ёрлерге, подстанцияланы тийрелерине кирирге жарамагъанын, токну аяусуз кюйдюрюп туруу къоранчлагъа келтиргенин да ангылагъандыла.

«Жарсыугъа, сабийле угъай, уллуланы кёплери да толу ангыламайдыла, чайникде сууну терк къайнар этген, телевизорну ишлетген, юйлеринде чыракъларын жандыргъан ток нечик къоркъуулу болгъанын. Адамла анга кеслерини саулукълары бла тёлеп тюшюнмез ючюн а биз, юйлеринде счётчиклеге къарай баргъанда, тюбешиуледе да аны юсюнден дайым айтханлай турабыз», - дегенди Виктория Базылева.

Электроэнергетикле школчуланы арасында быллай дерслени хар жыл сайын бардырыучудула. Алагъа юч мингден артыкъ сабий къатышады. Бу ишни кезиуюнде плакатла, презентацияла, башха материалла хайырланыладыла, мультфильмле да кёргюзтюледиле.