Жангы мардалагъа келишеди

Кёп болмай Тырныауузда «Маданият» миллет проектге кёре тынгылы ремонт этилгенден сора Отарланы Сейид атлы район библиотека  ачылгъанды. Аны жангыртыргъа федерал конкурсха къатышып, хорлагъандан сора онг табылгъанды. Саулай алып айханда, ишлеге 10 миллион сом къоратылгъанды.

Элбрус районну администрациясыны  башчысы Сотталаны Къурман жангыртылгъан  библиотекагъа энди бютюн да кёп адам келлигин белгилегенди.

Ишлени кезиуюнде учрежденияны полу, ичи, тышы,   коммуникациялары да  алышындырылгъандыла эм арбазы да омакъ болгъанды. Ол санда сабийлеге бла жаш адамлагъа зонала ишленнгендиле, китап окъугъан зал бла  абонемент бёлюм да тюрлендирилгендиле. Учреждение бийик технологияла бла  да жалчытылыннганды – мультимедия  оборудование, компьютерле, электрон китапла,  интерактив оборудование да алыннгандыла. Бюгюнлюкде китап фонд 27 минг  экземпляргъа жетеди.  Аны байыкъландырыу жаны бла да мадар этилгенлей турады.

Библиотекада  сакъатлагъа да  тап болурча онгла къуралгъандыла. Ол санда аллай сабийлеге интерактив жер жарашдырылгъанды. Андан сора да,  гитче окъуучула  заманларын сейир эм билимлерин айнытхан оюнла бла булжутурча амал къуралгъанды.   

Бюгюннгю излемлеге келишген  библиотеканы баш борчларындан бири жумушун  тынгылы тамамлап, окъуучуларын сылтаусуз этергеди. Анга кёре, мында  билдириу-маданият, билим бериу- жарыкъландырыу онгла тапдырыладыла.  Элбрус районну окъууучулары эм башхала да излеген информацияларын табарча бар амал тапдырылады.  Ол санда Интернет эм башха электрон амалла да  тири хайырланадыла. 

 

 

 

Магометланы Сулейман.
Поделиться: