Азыракъ налог тёлер амалла

Бизни къыралда озгъан жыл ючюн налогланы гражданла быйыл декабрьни биринчисине дери тёлеп бошаргъа керекдиле. Сёз мында транспорт, мюлк эмда жер ючюн тёлеулени юсюнден барады. Налог инспекция адамгъа жиберген билдириуде аланы ёлчемлери кёргюзтюледиле. Биз а аланы къайсыларын азайтыргъа боллугъуну юсюнден айтайыкъ. Бир-бир льготаланы налог органла эсге алып, тёлеуню кеслери азайтадыла. Алай бизден да мадар этиллигин излеген льготала да бардыла.

Сёз ючюн, мюлк налогну азайтыуну юсюнден айтайыкъ. Анга фатарланы, юйлени, отоуланы эмда аланы бир кесеклерини иелери тийишлидиле. Объектни ёлчеминден талай квадрат метр кетериледи, налог а андан къалгъаны ючюн тергеледи: фатардан – 20, аны бир кесегинден неда отоудан – 10, юйден а – 50 квадрат метр. Бу льготаны алыр ючюн заявление берирге кереклиси жокъду, налог инспекция аны кеси жарашдырады.

Льготагъа пенсиягъа чыкъгъанла да тийишлидиле. Ала иеликлеринде болгъан бир объект ючюн (фатар, гараж, юй, отоу) налогдан эркин этиледиле. Аны ючюн инспекциягъа заявление берирге керекди.

Жер налог. Бир участканы алты соткасы ючюн налогундан пенсиячыла эркин этиледиле. Жер юлюш андан аз эсе, къыралгъа жукъ да тёлерге керекмейди, андан уллу эсе уа, алты соткадан артыкъ кесеги ючюн келликди налог.

Бу амалны хайырланырча заявление жазаргъа тюшерикди. Бир игиси – бу льготаны 2017 жылдан окъуна тергерге боллукъдула. Пенсиягъа чыгъаргъа кёп заманы къалмагъан инсанлагъа (тиширыула – 55, эр кишиле – 60 жыл) да онг бериледи. Ала да алты соткалыкъ (бир) жер участкалары ючюн тёлерик тюйюлдюле. Бу льгота былтыр кийирилгенди. Аны жарашдырыр ючюн, заявление жазаргъа керекди.

Кёп сабийли юйюрлеге себепликге деп, мюлк налогдан бир кесеги кетерилирге боллукъду. Бу льгота акъылбалыкъ болмагъан юч эмда андан кёп сабийлери болгъан юйюрлеге бериледи. Анга кёре фатарны, отоуну неда юйде юлюшню ёлчеминден хар сабий башындан бешишер квадрат метр кетериледи, саулай юйню юсюнден айтханда уа – жетишер. Налог а къалгъан квадрат метрле ючюн тергеледи. Льгота заявление берип жарашдырылады.

Быллай юйюрлеге дагъыда жер налогну да азайтыргъа онг бериледи. Анга кёре участканы ёлчеминден алты сотка кетериледи, налог а къалгъан кесеги ючюн тёленеди. Мында да заявление жазмай боллукъ тюйюлдю.

Быладан сора да быллай юйюрлеге хар регион неда муниципалитет кеси энчи бир амал берирге боллукъду. Аланы тизмеси бла  nalog.ru сайтда шагъырейленирге тийишлиди. Жер-жерли льготаланы хайырланыр ючюн а шагъатлыкъ этген документлени кёргюзтюрге эмда заявление жазып берирге керек болуучуду.