Ичги - гюняхланы бек уллуларындан бири

Къолайлыкъ жаны бла къарасакъ, жашау къыйындан-къыйын бола барады десек, жангылмакъ. Аны юсюне да ичгичилик, наркомания, саякълыкъ кенг жайылгъандыла. Эллерибизде кеслерин ичгиге бергенлени санына къошула баргъан болмаса, ала азаймайдыла. 

Арт кезиуде уа тиширыуларыбызны арасында да энди ичгисиз болалмагъанла бардыла, деген хапар жюрюйдю. Мени бир танышым тау элледен биринде бир къауум тиширыу, ныгъышха эшиу эшерге чыкъсала да, ичерге мадар излеп башлагъанларын айтханда, бек сейир этген эдим. 

Аланы башчысы  намаз этген  болгъанын билгенде уа, бютюнда тамашагъа къалгъанма. «Дин чагъыр ичиуню унамайды ансы, аракъыны юсюнден аны жорукъларында жукъ да айтылмайды»,- деп, алай сылтау этген хапары барды. Аны ангылатырын мен Атмырзаланы Тахир хажиден тилегенме.

-Керти окъуна, бир-бирле аракъы харам тюйюлдю, ол таза будайдан этиледи деп, аман ишни, гюняхлы затны тюзге санайдыла,-деп башлайды ол кесини сёзюн.- Закондан, гюняхдан къоркъмагъанла аман ишлерини башларын жабар ючюн, болмагъан фатыуаланы туудурадыла. Не тюрлю осал ишден да артха турмайдыла. Мен тюз ниетли инсанлагъа Уллу Аллах эм сыйлы файгъамбарыбыз ичгини, адамны башын хайран этген затланы, башха тюрлю кир ишлени гюняхланы бек уллуларына санагъанларын аланы кеси сёзлери бла эсге салыргъа сюеме.

Аллахутала сыйлы Къуранда былай айтханды: «Эй, жюреклеринде ийманлары болгъанла, билигиз: шайтанны, аракъыча, наркотикча, адамны башын къатышдыргъан затла, алдаулу оюнла, таш салыу, билгичге барыу дегенча хылы-мылы ишлеринден кери турсагъыз, дунияда, ахыратда да насыплы болурсуз».

Аллахны келечиси уа кесини хадисинде: «Ичгиден, адамны башын хайран этген затладан кери болугъуз, ала гюняхланы «аналарыдыла»,-дегенди. Аны дагъыда былай айтханын эсигизге салыргъа сюеме: «Аллахутала быллай ючеуленнге жаннетге кириуню харам этгенди: ичгичиге, ата-анагъа боюн салмай, ассы болгъаннга, юй бийчесине саякълыкъ этерге къойгъаннга (биле тургъанлай, анга жукъ айтмагъаннга неда аны саякъ болуруна себеплик этгеннге). 

Файгъамбарыбызны быллай сёзлерин да юлгюге келтириуню тийишли кёреме: «Уллу Аллах ичги ичгенни къыркъ кюнню ичинде этген намазларын эмда хар иги ишлерин къабыл кёрмейди. Ким тоба этип, андан сора да къайтарып ичги ичсе, анга жаханим сууун ичирмей къоярыкъ тюйюлдю».

Ичгини харам болгъаныны, аны уллу гюняхладан бирине саналгъаныны юсюнден Къуранда эм файгъамбарыбызны хадислеринде башха да кёп тюрлю шартла бардыла. Ичги ичиучю, наркотикле хайырланыучу адам ёлсе, аны бетин, муслийманныча, къыбылагъа айландырып салсала, артда ол къыбыладан терс жанына бурулуп къалады. Ичгичи ёле туруп, ийман-шагъадат келтиралмай  кетеди дуниядан, деп айтылады.

Алайды да, хурметли газет окъуучула, адамларыбыз ичгиге, наркотиклеге андан бек берилгинчи, кеслерини ийманларын ахыры бла да тас этгинчи, жаш тёлюню бу дуния къыйынлыгъындан, ахырат азабындан да къутултууну къаты къолгъа алайыкъ. Ол кюрешни юйюрле, дин ахлула, саулай жамауат да бирге бардырыргъа тийишлиди. Бюгюн кёрмегенча этип турсакъ, тамбла кеч болур.

Мен акъыл этгенден, бусагъатда халкъыбызны жашауунда ичгичилик бек уллу къыйынлыкъ болуп турады. Анга кеслерин бергенле ишлеп, баш кечиндирирге сюймейдиле, юйюр къурамайдыла, адамлыкъларын тас этедиле. Биз, дин ахлула,быллай къыйынлыкъны кёре тургъанлай сёз айтмасакъ, Аллахны аллында терсбиз. 

Аны себеплиди бизни халкъыбызны келир заманда къадарыны юсюнден жарсып, насийхат сёз айтханыбыз, ууаз бергенибиз. Ким биледи, бу биз айтхан шартладан тийишли оюм этип, кеслерин ичгиден, наркотикледен, аманлыкъдан тыйып, Аллахны ыразылыгъын табар эселе уа эллерибизде бет сыфатларын, адамлыкъларын да тас эте баргъан мукъминлерибиз.

Ала къалай ангыламайдыла дунияда, ахыратда да алагъа кечгинлик болмазлыгъын? Къарынларын тыяр ючюн, уллу гюняхха къалгъанла, бетлерин жойгъанла, юйлерине къаугъа салгъанла, жууукъларына, ахлуларына, миллетлерине жарлылыкъ, жарсыу келтиргенле быллай шартдан окъуна оюм этселе уа! «Жашым, -дегенди дин ахлуладан бирлери, -гитчелей ёлген эди. Бир кече тюшюмде ол, къарт бет алып, чачы чиммакъ болуп кёреме. 

- Балам,быллай халгъа  нек жетгенсе? - деп сорама. Ол заманда жашым манга былай айтады: «Мени къабырымы жанында ичгичи адамны ёлюгюн асырагъандыла да, аны кёрюнде жаханим оту асыры къызыу жаннгандан,алайда асыралгъан сабийлени чачлары,ол азапны кётюралмай, чал болгъандыла».

Алайды да, хурметли дин къарындашларыбыз,эгечлерибиз, ичгини заранлыгъы бла азабы хар муслийманнга жетеди. Андан кесибизни тыяргъа насып берсин Уллу Аллах барыбызгъа да. 

ТЕКУЛАНЫ Хауа жазып алгъанды.
Поделиться: