Мария жюрегиндегин айтханды

Битеудуния женгил атлетиканы бек жарыкъ жулдузларындан бири прохладначы  Мария Ласицкене бу кюнледе инстаграмда кесини страницасында россейли спортха башчылыкъ этген къуллукъчулагъа кесини кёлкъалдысын айтханды. Анда сёз бир къауум россейли спортчула допингни хайырланнганлары бла байламлы саулай команда аман бетли болуп тургъанларыны юсюнден барады. 

«…Арт юч жылны ичинде мен къуллукъчуларыбыздан жюз кере эшитгенме ала хар неда тапды эм ма бусагъат россейли спортчулагъа  халкъла аралы эришиулеге кеси байракълары бла къатышыргъа эркин этерикдиле, деп. Алай ала жаланда омакъ, алдауукъ сёзледиле. Бизни, спортчуланы, телилеге санап, сабийни конфет бла алдагъанча этедиле. Битеу ол адамла спортчула бир жукъ ангыламагъан сунадыла. Аланы оюмларына кёре, биз, ауузларыбызны къысып, кеси ишибизни этип турургъа борчлубуз. Алай атлетле болмагъан къадарда бир тюрлю федерациядан магъана жокъду. Бир бирлерин къоруулай, оноучула бизни жукъгъа да санамайдыла. Керексиз отчётла неда Запад бизни атлетледен къалай къоркъгъаныны юсюнден жомакъла бюгюнлюкде  биреуге да сейир тюйюлдюле.

Арт жыллада бизни таматаларыбыз женгил атлетикагъа салгъан заранны юсюнден айтып бла жазып бошагъан къыйынды. Мен ол адамла къуллукъларындан  кеси ыразылыкълары бла кетселе излейме. Былайда сёз жаланда оноучуланы юслеринден бармайды. Допингни хайырланып, ансыз бир тюрлю жетишим болдурур амал жокъду деген тренерле да кетерге керекдиле. Нек дегенде ансыз россейли женгил атлетикагъа кёз къарам бир заманда да тюрленирик тюйюлдю.

Аллай сыйсыз ишле бла кюрешгенлени хаталарындан таза спортчуланы да аманлайдыла. Женгил атлетикагъа келген жаш спортчула допинг деген затдан кери бола ёсерге, жетишимли болургъа юйренирге керекдиле. Спортчуну кёз къарамын а тренери къурайды. Ол биринчи кюнден окъуна аны къалай юйретсе, къаллай ызны белгилесе, атлет аны бла барлыкъды. 

Сора дагъыда допингни сау дуния хайырланады деген магъанасыз  хапарланы жюрютюуден хайыр жокъду. Къалгъанла бла бизни ишибиз болмазгъа керекди. Бек алгъа кеси оноуубузну кёрюп, женгил атлетикабыздан къалгъан мыдыхлары ёчюлмезча этерге борчлубуз».
Марияны бу жазгъанын тогъуз мингден артыкъ адам жаратып, анга ыразылыкъларын билдиргендиле.  300-ге жууукъ адам да кеси оюмларын  айтхандыла. 

Басмагъа Къасымланы Аминат хазырлагъанды.
Поделиться: