Алимлерибизни рентген комплекси Германияда да кёргюзтюлгенди

РАН-ны Къабарты-Малкъарда илму арасында медицинада хайырланырча цифралы  томосинтез эталлыкъ кёп функциялы рентген комплексни жарашдырыу бла кюреше турадыла, деп билдиргендиле учреждениядан.

Илму арада айтханларына кёре, шёндю бек кенг хайырланылгъан диагностика амалгъа рентгенография саналады. Алай аны бир кемчилиги барды – ол шаугютлени бла сингирлени  хазна кёргюзталмайды. Аны уа сагъынылгъан комплекс бек тынгылы тамамларгъа керекди.

Проектни илму жаны бла мурдорун Араны прикладной математика эмда автоматизация институтуну башчысы Анатолий Алиханов бла тергеуле этиу бёлюмюню башчысы Аслан Апеков къурайдыла. Ала кёргюзтген амалны хайыры бла рентген сурат бек къысха заманны ичинде жарашдырылады. Бу технологияны ала SPIE Electro-Optical Remote Sensing XII (Берлин, Германия) эмда «Прикладной математиканы эм магъаналы проблемалары» деген тёртюнчю халкъла аралы илму конференциялада да кёргюзтгендиле. 

Аппаратны къураугъа Юг федерал университет бла «Севкаврентген-Д» предприятие да къатышадыла. Проектге битеу да 230 миллион сом къоратыллыкъды. Арада айтханларыча, бу рентген комплексни хайыры бла медицина диагностиканы качествосу бютюн иги боллукъду.

Улбашланы Мурат
Поделиться: