Шахар тийреле мардалагъа келиширча

Кёп болмай Битеуроссей халкъ фронтну Къабарты-Малкъарда бёлюмюню (ОНФ) келечилери адамланы тилеклери бла  мониторинг бардыргъандыла. Анга кёре,  шахарны   администрацисына  Биттир улу орамда къоркъуусузлукъгъа эс бурулмагъанына, ол санда  тротуар ишлерге кереклиси  билдирилгенди. Бу маршрутну кюн сайын  билим бериу учреждениялагъа жюрюген танг кесек сабий хайырланнганы уа бютюн жарсыулуду.  

Микрорайонда  жаяу жюрюгенлеге жолчукъла эрттеден бери сакъланадыла. Быйлайда терек бахчала, кёп фатарлы юйле да орналадыла. Бусагъатда   сагъынылгъан участокда 400-ден  аслам юйюр жашайды. Аланы кёбюсюню школчулары барды. Мында узакъ болмай  8-чи эм 33-чю номерли мектепле эм башха билим бериу учрежденияла да  орналадыла. Жамауат транспорт иги   жюрюмегени ючюн,  сабийле сакълай турмай, жолну иги кесегин жаяу къыдырадыла. Кече кезиуде бла кюн бузлагъанда уа   мутхузлукъ  уллу къоркъуу салады.  Сёз ючюн, алгъаракълада да  биреулен  ачыгъанды.

 - Биз адамланы тилеклери бла Нальчикде социал магъаналы жолла  бла турист объетлени бир къауумун  тинтгенбиз. Аны чеклеринде Биттир улу орамгъа да эс бурулгъанды эм аслам кемчилик  табылгъанды.  Былайда, эм биринчиден тротуар, «зебра»  да ишленирге керекдиле.  Аны ючюн уллу къыйын салыргъа, мурдорларын хазырларгъа тюшерик тюйюлдю,- дейди ОНФ-ну «Жашау журт эм шахар тийре» тематика жаны бла  келечиси  Ислам Макоев.

Сагъынылгъан участокда Биттир улу орамдан сора да, Театральный эм Канукоев атлы орамлада да   кемчиликле тинтилгендиле.  Аланы тамамларча бир мадар этилирине тилек бла  жамауатчыла шахарны мэриясына письмо жибергендиле.

Аны  бла бирге ОНФ-ну келечилери  Нальчикде машинала сюелген жерледе  сакъатла къыйналмазча онгла къуралмагъанларына да эс бургъандыла. Сёз ючюн, саулугъунда бир тюрлю кемчилиги болгъан  машинадан тюшгенден  сора, тротуаргъа ёрлерча аслам кюч салыргъа керекди. Аллай жерлеге «Россия» къонакъ юйню, ара межгитни, шахар адмнистрацияны алларын эм кёп башха жерни келтирирге боллукъду. 

- Арт жыллада «Къоркъуусуз эм качестволу автомобиль жолла» миллет проектге кёре, республикада танг кесек жол жангыртылгъанды,  быйыл да иги кесек жумуш этилгенди.  Аны хайыры бла ара орамланы иги кесеги омакъ болгъанды. Болсада бир-бир жерледе сакъатлагъа тап болурча онгла тийишли халда  къуралмагъанлары уа  кёплени жарсытады. Бютюнда аслам бузукълукъ стоянкалада табылады. Аланы  пандуслары болмагъаныны  хатасындан,  арбачыкълада жюрюгенле тротуаргъа барыр ючюн жолгъа чыгъаргъа,  башханы болушлугъун излерге тюшеди,- дейди ОНФ-ну келечиси Евгений Бакаев.

Экспертле айтханнга кёре, объектлени жангыртхан кезиуде сакъатланы онглары  да эсге алынса, бек ахшы боллукъ эди.  Аны ючюн  жамауатчыла кемчиликлени заманында тинтирча КъМР-ни Транспорт эмда жол мюлк министерствосу бла къысха байламлыкъ жюрютедиле. Табылгъан бузукълукъланы кетерирча тийишли инстанциялагъа билдиредиле.