Китапханада – жарыкъ байрам

Бараз кюн Нальчикде Мечиланы Кязим атлы республикалы жаш тёлю китапханада аламат байрам ётгенди. Ары къонакъгъа 6-чы номерли шахар школну окъуучулары эм Женгил промышленностьну колледжини студентлери чакъырылгъан эдиле. КъМР-ни Маданият министерствосу алагъа фахмулу жаш жазыучула Хаджиланы Жамиля, Марина Мазуренко эм Зарема Куготова бла тюбешиу къурагъанды.
Байрам а библиотеканы арбазына келген библиобусха – Мобил  информациялы комплексге - тюбеуден башланнганды. Анда окъуучула кёп сейир китапла эм периодикалы басмала бла шагъырей болгъандыла. Ызы бла уа китапханада «Ёмюрлюк китапла» деген кёрмючню ачылыуу ётгенди. Анда хар тёлю да сюйюп окъугъан китапла жыйышдырылгъан эдиле.
Дагъыда ары келгенлени  КъМР-ни 100-жыллыгъына аталып бардырылгъан «Бизни туугъан жерибиз» деген сабий сурат конкурсда хорлагъанланы чыгъармаларындан къуралгъан кёрмючге да багъа берир онглары болгъанды. Миллет музейни хазнасында Нальчикни тарыхын ачыкълагъан сурат экспозиция да уллуну, гитчени да сейирлерин къозгъагъан эди.
Китапхананы окъуу залында уа сабийлеге деп тюрлю-тюрлю викторинала, элберлени билиу эришиу ётгенди. Дагъыда ала назмула да окъугъандыла.
Къонакълагъа уа РФ-ни сыйлы артисткасы Таукенланы Галинаны сохталары аламат концерт кёргюзтгендиле, деп билдиреди Маданият министерствону пресс-службасы.