Тазир заманында тёленмесе, эки кереге кёбейтиледи

Бир ыйыкъны ичинде – 1-7 июньда – жолда жюрюуню жорукъларына бузукълукъланы эсепге алгъан автоматизацияланнган системала республиканы жолларында  16,4 мингден аслам бузукълукъ этгенин ачыкълагъандыла.  Бу кезиуде 9,4 миллион  сом тазир салыннганды.

Ыйыкъны ичинде водительле 2,4 миллион сомгъа жууукъ тёлегендиле. 
Полициячыла административ тазир 60 кюнню ичинде тамамланылыргъа кереклисин эсгертедиле. Болжал сакъланмаса, материалла сюд приставлагъа бериледиле. РФ-ни Административ бузукълукъланы кодексине тийишлиликде уа бу кезиуде тазирни ёлчеми эки кереге кёбейтиледи. 

Борчну азайтыр мурат бла федерал законлагъа тюрлениуле кийирилгендиле,  ол санда машинаны жюрютюрге эркинлик сыйырылыргъа боллукъду, тазир он минг сомдан кёп эсе уа, аллай адам тыш къыраллагъа бараллыкъ тюйюлдю.  

Болсада водительлеге женгилликле да этилгендиле, ол санда бузукълукъну юсюнден бегим чыгъарылгъан кюнден башлап аны 20 кюнню ичинде тёлеген, ахчаны жартысын берип къояргъа боллукъду. 

Тазир салыннганын бла къалгъанын УГИБДД-ны сайтында, къырал жумушланы порталында (www.gosuslugi.ru), кёп функциялы аралада неда «Кавказ» федерал жолда  (алгъын «Шалушка» пост болгъан жерде) къуралгъан къырал жумушла тамамланнган къошакъ пунктда билирге онг барды.