Наркотиклени законсуз сатханлагъа 15 уголовный иш ачылгъанды

Наркополициячыла «Чахчах-2019» ведомствола аралы профилактика операцияны ал эсеплерин чыгъаргъандыла. Аны биринчи бёлюмю 13-22 майда бардырылгъанды эмда бу кезиуде наркотиклени законлагъа бузукълукъла этип сатханлагъа, хайырланнганлагъа онбеш уголовный иш ачылгъанды.   Аладан сегизиси ауур эм бек ауур бузукълукълагъа саналадыла. Он адам уголовный жууапха тартылгъанды, экеуленнге уа административ протоколла жарашдырылгъандыла. Наркополициячыла законсуз сатыу-алыудан 1,5 килограмм уулу зат сыйыргъандыла. 

«Шахшах» операция республиканы битеу районларында да толтурулады эмда ноябрьге дери бардырыллыкъды. Ол наркотиклени сатыу-алыу бла байламлы законлагъа бузукълукъланы тохтатыр, уулу хансла ёсген жерлени ачыкълап, аланы жокъ этер мурат бла къуралгъанды.

Полициячыла наркотиклери болгъан кырдыкланы ёсдюргенлени эм аланы сатханланы жууапха тартыу жумушлагъа энчи эс бурадыла. 
Наркополициячыла республиканы жамауатын сакъ болургъа, уулу, психотроп затланы сатханланы,  ёсдюргенлени юслеринден шартланы право низамны сакълаучу неда жашагъан жерлеринде толтуруучу власть органлагъа белгили этерге чакъырадыла.