Чёрчекликлерин бла эслиликлерин кёргюзтгендиле

Кёп болмай Къабарты-Малкъар къырал аграр университетге быйыл кирген жаш адамланы студентге алыугъа жораланнган байрам ётгенди. Ол «Здравствуй, Аграрный!» деген 
чакъырыу бла ётгенди.

Байрамны университетни юйретиу, социал иш эм жаш тёлю политика жаны бла проректору Ауес Кумыков ачханды. Ол вузну сайлап келген къызлагъа бла жашлагъа белгилеген ызларындан таймай, башлагъан жумушларын ахырына дери жетдире турурларын тежегенди. 
Ызы бла биринчи курсха келгенлеге «студент» деген сыйлы атха тийишли болур ючюн конкурслада бла тюрлю-тюрлю эришиуледе акъылларын бла чёрчекликлерин кёргюзтюрге тюшгенди. Вузну студентлери адамны фахмусун ачыкълагъанына себеплик этген тюрлю-тюрлю оюнланы кёргюзтгендиле. Онбеш къауумда 90 адам бар эдиле. Ала 3 сагъатны ичинде, кеслерини билимлерин, эслиликлерин кёргюзте, эришгендиле. 
Университетни пресс-службасындан билдиргенлерине кёре, анда хорлагъанла Нальчикде бардырылыучу тюрлю-тюрлю жаш тёлю оюнлагъа къатышыргъа эркинлик берген сертификатла къоллу болгъандыла.