Экспортха себеплик этиу тохтамайды

Россейге санкцияла кийирилгени ючюн бизни республикада тыш къыралла бла сатыу-алыу этген предприятияланы ишлерине дайым къаралады. Алада тюбеген чурумланы ачыкълау иш тири бардырылады, дейдиле КъМР-ни Экономиканы айнытыу министерствосунда.

Республиканы Правительствосуну эмда Экспортха себеплик этген арасыны болушлукълары бла, ол санда «Халкъла аралы кооперация эмда экспорт» миллет проектни тамамлауну чеклеринде, былтыр сегиз гитче эмда орта предприятие 584,6 минг доллар багъасына он экспорт келишим этгендиле. План бла уа тёртюсюн этерге керек эди.

Дагъыда предпринимательлеге эки мастер-класс бардырылгъанды, аланы бир къаууму Азербайджанда Баку шахарда бизнес бла байламлы тюбешиулеге къатышхандыла. Быйыл 6-9 сентябрьде КъМР-ден бир ненча предприятие Москвада ётген «Текстильлегпром-2022» кёрмючге баргъандыла. Аны ючюн ала хакъ тёлемегендиле. Дагъыда ол халда «Армения-Экспо 2022» эмда «WorldFood 2022» кёрмючледе болгъандыла. Биринчиси – 6-18 сентябрьде Арменияда Ереван шахарда, экинчиси уа 20-23 сентябрьде Москвада ётгенди. Дагъыда 118 предприятиягъа консультацияла эмда башха тюрлю жумушла этилгендиле.

Былтыр ётген «Экспортёр года-2021» конкурсну чеклеринде «Экспорт проектни жашау кезиую» семинар программа бардырыргъа оноу этилгенди. Аны «Экспортну школу» АНО къурагъанды. Экспорт ишни къураугъа жораланнган сегиз семинаргъа 78 гитче эмда орта предприятие къатышханды. Предпринимательлеге дагъыда вебинар бардырылгъанды. Анда уа сёз санкцияла кийирилген кезиуде экспортха билеклик этиуню юсюнден баргъанды.

Быйылны ахырына дери «Экспортну школу» энтта да юч семинар ётдюрюрге умутлуду. Республикадан предприятияла уа тыш къыраллада – эки эмда Россейде бир халкъла аралы кёрмючлеге къатышырыкъдыла. Бир предприятие уа Тюркде электрон сатыу-алыу системагъа къошуллукъду.

Халкъла аралы байламлыкъланы айнытыу эмда тыш къыралла бла сатыу-алыуну тирилтиу иш андан ары бардырыллыкъды.