Сакълыкъны унутургъа жарамайды

Бусагъатда ковидден ауругъанланы асламысы къыйналмай къутуладыла. Сора тынчайыргъа боламыды? Огъесе сакъ болургъамы керекди? Аны юсюнден биз Нальчик шахарны биринчи номерли поликлиникасыны баш врачы Аулият Каскулова бла ушакъ этгенбиз.

- Бусагъатда коронавирусдан къоркъургъа керекмиди?

- Ауруу женгил баргъанлыкъгъа, сакъ болургъа борчлубуз. Жангы вирус инфекцияны бир тюрлюсю «омикрон» бек терк жайылады. Алай аны бла бирге тёрели ОРВИ да  тюбейди, адамла солургъа баргъан жерлеринде, халкъ жыйылгъан жерледе боладыла, аны себепли кеслери бла бирге тюрлю-тюрлю инфекцияланы да келтиредиле.

Ковид болгъаны ачыкъланнганы бла вирусха къажау терапия бардырылады. Врач айтмагъанлай антибиотиклени ичип башларгъа жарамайды.

- Омикрон къоркъуулу тюйюл эсе, врачны чакъырмай, юйде сау болуп къалыргъа жараймыды?

- Бизни республикада кеслери аллына багъылгъанла аз тюйюлдюле, ала бек терс иш этедиле. Вирусха къажау препаратны дозасын, къаллай бир ичерге кереклисин жаланда врач биледи, тюз ол айтханча этмесегиз, терк сау боллукъ тюйюлсюз.

Мен энчи чертип айтыргъа сюеме: аурууну биринчи шартлары ачыкъланнганлай, врачны чакъырыргъа керекди. Бусагъатда да ковидден ёлгенле бардыла. Аланы асламысы инсульт, инфаркт болгъанла, диабетден къыйналгъан адамладыла, хроникалы ауруулуладыла. Ковид  «жукълап» тургъан хроника аурууланы уятады, сора анга къошакъгъа саусуз врачны да чакъырмай созса бир кесек заманны, анга болушургъа бек къыйын болады.

- Ковид кимлеге бек къоркъуулу болгъанын энтта бир эсгертсегиз эди?

- Шёндю омикронну тёртюнчю эм бешинчи тюрлюлери жайылыпдыла. Алада сабийлеге, уллайгъан адамлагъа, ауурлукълары болгъан тиширыулагъа къоркъуулудула. Алай саусуз заманында врачны чакъырса, дарманланы ол айтханыча хайырланса, сууну кёп ичип, тёшегинде турса, жети-сегиз кюннге аягъы юсюне турлукъду.

Ковид жукъгъан адам жётел этгенде чючгюргенде аурууу къатындагъылагъа жугъаргъа боллукъду. Аны ючюн саусуз кесини отоуунда турса игиди.

- Бусагъатда вакцинация бардырыламыды?

- Хау, бютюнда алтмыш жыллары толгъанлагъа ол бек магъаналыды. Гриппден да, ковидден да дарман салабыз. Гриппден совигрипп барды, ауурлукълары болгъанлагъа – ультрикс.  Ковидден а «Спутник V»: жаш адамла биринчи компонентин этселе да жетишеди, алтмыш жылдан озгъанла уа эки компонентин да этселе, игиди. Дарман салыуну кючю алты айгъа жетеди.