Минги тауда тау лыжачыланы къырал командалары усталыкъларын ёсдюредиле

Бюгюнлюкде Минги тауда россейли лыжачыла юйрениу-жарау этиу жыйылыуларын бардырадыла. Аланы ски-кросс эм могул дисциплиналада жарауларына Россейни фристайлдан федерациясыны президенти Алексей Курашов да келгенди. Аны лыжачыла эм тренерле бла тюбешиуюнде хазырланыу къалай ётгени сюзюлгенди. Белгили болгъаныча, спортчула могулдан майны ахырына дери, ски-кроссдан да 8 июньнга дери юйренирикдиле.

Эр киши тау лыжа команданы тренери Тимофей Антиосов билдиргеннге кёре, ала мында талай заманны турадыла, кюнню халы иги болгъаны бек къууандырады. Тау тикле Европалы къаяладан артха къалмайды. Сора бек магъаналысы уа - биз кесибизни юйюбюздебиз, «Эльбрус» курорт бла арабызда ахшы байламлыкъла тохташхандыла, бир бирибизни толу ангылайбыз. Курортну башчылары хар нени да иги къурагъандыла: тикле, канат жолла, тургъан жерлерибиз, аш-азыгъыбыз бийик даражададыла. Алай бла спортчуларыбызгъа усталыкъларын ёсдюрюрге битеу онгла бардыла. Россейде тау лыжачыланы жайда хазырларгъа быллай болумла болгъаны бек къууандырады. Бусагъатда Элбрусда адам кёпдю, бизден сора да, тиширыу команда юйрене турады. Регионланы тау лыжа командалары да келгендиле, жер барыбызгъа да жетеди, дегенди ол.