Эсирген жолда бютюнда къоркъуулуду

Быйылны биринчи жарымында кеф болуп, жолгъа чыкъгъан 1300 водительни ачыкълагъандыла къыралавтоинспекторла. Аладан 231 инсан бу бузукълукъну къайтарып этгендиле.

 Аны юсюнден журналистлеге УГИБДД-ны къырал инспектору полицияны майору   Заур Кунижев айтханды. «Эсирип, жангыдан жолгъа чыкъгъан водительлеге РФ-ни Ук-сыны 264.1-чи статьясына кёре терслеу материалла жыйышдырыладыла. Жолда   эсирген водитель бютюнда  уллу къоркъуу болгъанын айтырчады. Аланы хатасындан   аварияла бютюнда ауурдула, алада адамла жоюладыла, ауур жарала аладыла. Аны ючюн быллай бузукълукъланы профилактикасы баш борчларыбыздан бириди»,-дегенди ол.

Бу кюнледе уа полициячыла «Кеф водитель» деген энчи операцияны кезиулю кере бардыргъандыла. Бир кечеге къыралавтоинспекторла кеф эм машинаны жюрютюрге эркинлиги болмагъан  водительлени ачыкълагъандыла, деп билдиргендиле ведомстводан.

Ол кече 8 инсан ичип, руль артына  олтурургъа оноу этгендиле. Энтта 28 адамны уа транспортну жюрютюрге энчи эркинликлери болмагъанды. Тёрт водитель бузукълукъну къайтарып этгендиле. 31 машина энчи стоянкагъа жетдирилгендиле.

Республиканы хурметли жамауаты. Сизге машинаны кеф адам жюрютгени неда жолда биреу башхаланы жашауларына, саулукъларына къоркъуу салгъаны белгили болса, аны юсюнден бу телефон номерлеге сёлешип айтырыгъызны тилейдиле право низамны сакълаучула: 8 (8662) 495062, 961000, 911096 неда 102.

Тикаланы Фатима хазырлагъанды.

Поделиться: