Ишсизлени санын азайтыр онгла изленедиле

Къабарты-Малкъарда бюгюнлюкде ишсизлени эсебинде 9,6 минг адам барды. Ол а былтыр бу замандан 2,1 кереге азды. Алай бла республикада ишлерге онглары болгъанланы арасында пособие кереклиле 2,1 процентни тутадыла. Аны юсюнден КъМР-ни Урунуу эмда социал къоруулау  министерствону  сайтында билдириледи. 

Быйылны биринчи жарымында 9 минг адам урунууну рыногунда сурам болгъан ишчи усталыкълагъа къошакъ халда юйреннгендиле. Аны бла бирге 1,5 минг инсаннга усталыкъ сайларгъа болушурча эсгертиуле этилгендиле. Ол санда ишчи эм окъуу  жерле бла шагъырейлендирген 22 ярмарка ётдюрюлгенди. Анга республиканы  36 предприятиясы къатышханды.

Андан сора да, жаш адамла жай каникуллада бир тюрлю ишде  къармашып башларларына себеплик этилгенди. Дагъыда 528 инсаннга уа кеслерине бир тюрлю иш къураргъа болушлукъ тапдырылгъанды.

Эсге сала айтсакъ, Къабарты-Малкъарда  «Демография» миллет проектге кёре, хакъсыз ишчи усталыкъ алырча  эм  къошакъ халда билимлерин ёсдюрюрча  курсла бардырыладыла. Бусагъатда алагъа жюрюрге сюйгенлерин  436 инсан билдиргенди.