Иссилик цифралы телевиденияны ишине чырмау саламыды?

Жай иссиледе юйлени башлары, алада орналгъан телевидение антеннала да бек къызаргъа боллукъдула. Аны хатасындан сигнал осалына кетеди, бирде уа телевизор кёргюзтмей окъуна башларгъа болады. Андан къутулур амал бармыды?

Антенна

Бизни къыралда абонент тёлеу бермей жыйырма каналгъа къараргъа онг барды. Цифралы телевиденияны хайырындан бериуле бек ариу кёрюнедиле, аланы тауушу да тап келеди. Алай жайда уа, антенна этилген темир артыкъ иги болмаса, сигнал тас болуп кетерге боллукъду.

Антенналаны кёбюсю 60 сууукълукъдан башлап, 40 градус иссиликге дери ишлейдиле. Хауаны мылылыгъы жюз процентге жетсе окъуна, алагъа хазна хата болмайды. Отоуда орнатылыучу антеннала уа аллай чыдамлы тюйюлдюле; ала жаланда +5+35 градус жылыуда ишлейдиле.

Иссилик болуучу регионлада хауаны болумларына чыдамлы антенналаны хайырланыргъа керекди. Сигнал тас болса, биринчиден, антеннаны кабель къошулгъан жерине къарагъыз. Ол юзюлюп неда тапсыз къошулуп тургъанын кёрсегиз, аны жангысына алышыгъыз. Дагъыда антенна телебашня таба бурулуп турургъа керекди да, анга да кёз жетдиригиз. Бирде жел аны бир жанына буруп, аны ючюн сигнал осалыракъ да болады.

Телевизор

Электрон-лучевой трубкалары болгъан эски телевизорла +5+40 градусда ишлейдиле. Жангы тюрлюлери да аладан хазна артха къалмайдыла, +5+35 градус болса да тап кёргюзтедиле. Алай телевизорну кюн тюбюне салыргъа уа керекмейди. Алай этсегиз, ол кёпге бармай бузулургъа боллугъуна ийнанып къалыгъыз.

Бир-бир телевизорланы исси болгъанда токну ёчюлтюучю устройстволары барды. Бирлери хауа къызып тебирегенини юсюнден экранларында жазып да билдиредиле. Алай болса, аны токдан ёчюлтюрге керекди.

Приставка

Телевизор приставкала да къыза кетип бузулургъа боллукъдула. Аланы кёбюсюню инструкцияларында +5+35 жылыулукъда ишлетирге жарайды деп жазылады. Алай учуз модельле уа къайсы кюнде да къызып бузулургъа боллукъдула. Иш алай боллугъуну биринчи белгиси телевизор осал кёргюзтюп башлагъаныды. Аллай приставканы игирегине алышыргъа тийишлиди.

Быллай техниканы къайсысы да болсун, аны хайырланыу жорукъланы сансыз этмесегиз, ол кёп заманны бузулмай ишлеп къууандырлыкъды.

 

Омарланы Мурат хазырлагъанды.
Поделиться: