Узакъ ёмюрлю болур ючюн – ичгини къояргъа

 Швецияны Каролин институтуну алимлерини тинтиулерине кёре,  ичгини ахырысы бла къоюу адамны жашауун 28 жылгъа узун этерге боллукъду.   Экспертле 20 жылны ичинде Данияда, Финляндияда бла Швецияда ичгичилени жашауларыны узунлукъларын тинтгендиле. Аланы араларында тюрлю-тюрлю аурууладан ёлгенлени саны иги да кёп болгъанды, жаашуларыны узунлугъу уа 28 жылгъа азайгъанды. Аракъыны адамны чархына зараныны юсюнден врачла да тохтаусуз айтадыла. Аз ёлчемледе окъуна ол онкология аурууланы къозгъайды, мыйыны терк къартайтады, къаратонлукъгъа келтиреди, жюрекге бла бауургъа да хаталыды.

Аны бла бирге алимле жашауну 10 жылгъа созаргъа болушурукъ тёрт къылыкъны  юсюнден эсгертгендиле. Ала юйретгенлерича, кёгетле бла тахта битимлени  азыкъгъа аслам къошаргъа, жарсыуладан бла мугурайып тургъандан къутулуп, жашауда къууанырча кезиулени ычхындырмазгъа, ичгиден бла  тютюнден кери турургъа тийишлиди.

Тузланнган чабакъны (сельдь) дайым ашау жюрек-тамыр системаны бла богъурдакъ безни ишлеулерин игилендиреди. Анда адамны чархына керекли витаминле, минералла, аминокислотала бла жаула бардыла, дейди врач-диетолог Светлана Фус. Жангызда бир аллай чабакъда Омега-3 жаулу кислотаны бир-эки кюннге керекли нормасы барды. Бу вещество жетишмеген адамла мудахлыкъдан къыйналадыла, кёллери жарыкъ болуп турмайды. Андан тышында,  Омега-3 терини терк къартайыудан сакълайды, мыйыны бла кёзню сетчаткасына хайырлыды. Аны дагъыда бир ахшы жаны – йодну, селенни бла Е витаминни кёплюгюдю. Ала адамны иммунитетин кючлейдиле, эркин радикалланы хатасын азайтадыла. 

Диетолог Андрей Бобровский а адамны чархына соханны игилигини юсюнден айтханды. Ол витаминлеге, микроэлементлеге бла фитонцидлеге байды, ала уа иммунитетни кётюргенден тышында, аш-азыкъ эритиу, жюрек-тамыр, нерва системалагъа да себеплик этедиле.