Жалгъан билдириу ючюн жууаплылыкъ къатыды

Арт кезиуде билим бериу учреждениялада чачдырыучу зат салыннганды деген билдириуле этилип, дерслени тохтатып, сабийлени юйлерине ашырыргъа   тюшген кезиуле кёбейгендиле. Алай теракт хазырланнганыны юсюнден жалгъан билдириу этген адам жууапха тартыллыгъын билирге керекди.

Асламында окъуучула дерсге,   сынау ишге, экзаменнге хазыр болмай, аман белгиле алмаз умут этип, устазлагъа, школну таматаларына, къутхарыучулагъа сёлешедиле.  Акъылбалыкъ болмагъанла  бу хыпыярлыкъларына  уллу магъана бермей,  жууапсыз къаллыкъларына ийнанадыла.

Болсада КъМР-ни прокуроруну тамата болушлукъчусу Сотталаны Жаннаны бизге ангылатханына кёре, РФ-ни УК-сыны 207-чи статьясында белгиленнгенича, быллай «оюнла» терактны юсюнден жалгъан билдириуге саналадыла. Аллай бузукълукъ этген уголовный жууапха тартылады, тазырны ёлчеми 250 минг сомгъа жетеди.  Неда терсленнгенни 1-1,5 жылгъа дери айлыгъы, башха файдасы къыралгъа бериледи, аны бир-бир эркинликлери 3 жылгъа сыйырылыргъа неда  2 жылдан 3 жылгъа дери хакъсыз борчлу ишлеге тартылыргъа да боллукъдула.

Сабийле телефон бла сёлешселе, аланы билмезлик, тапмазлыкъ сунадыла. Алай ала бек жангыладыла. Шёндюгю заманда право низамны сакълаучуланы телефонну иесин, ол угъай, адам къалайдан сёлешгенин окъуна тохташдырыргъа битеу мадарлары бардыла. Къысха айтханда, жаш адам терактны юсюнден жалгъан билдириу этген эсе, анга 14 жыл  толса,  уголовный жууапха тартыллыгъын билирге керекди,-дегенди Сотталаны Жанна.