Энергетикле токну ызына терк къайтаргъандыла

Онекинчи майда ингирде сагъат сегизни жарымында уллу жел ургъаныны  эмда сакъ жауун жаугъаныны хатасындан «Нальчик» подстанциядан чыкъгъан 110 кВт кючлю электрокюч ыз ёчюлгенди эмда Чегем районда Шалушка, Каменка эм Яникой элледе жашагъан юч минг чакълы адам токсуз къалгъанды. Саулай айтханда, бу тийреледе 20 трансформатор подстанцияны иши тохтатылгъан эди.

Ызы бла «Каббалкэнерго» компанияны энергетиклери, терк окъуна мадар этип, электрокюч оборудованияны тап халгъа келтиргендиле. Ток бла жалчытыу тийишлисича башланыргъа жаланда тогъуз минут къоратылгъанды, деп билдиргендиле андан.

Къабарты-Малкъарда сакъ жауунла бла уллу желле аслам боллукъдула деп  белгиленнгени себепли энергетикле дайым сагъайыудадыла. Къалайда не тюрлю чырмаулукъ чыкъса да, ары терк жетерге, болумну тюзетирге хазырдыла. Аллай эмда кезиулю ишлени юсюнден билир ючюн, «МРСК Северного Кавказа» компаниягъа кече-кюн демей 8-800-775-91-12 (хакъсыз) номерге сёлеширге  боллукъду. Тийишли информация аны интернет сайтында «Потребителям» - «Информация по ограничениям режима передачи электрической энергии» деген бёлюмюнде басмаланады.