Тахта кёгетледен къытлыкъ сынарыкъ тюйюлбюз

Бизни республика тахта кёгетле бла артыгъы бла окъуна жалчытады. КъМР-ни Эл мюлк министерствосундан билдиргенлерича, мюлкле продукцияларыны бир кесегин тыш регионлагъа да сатадыла.

Шимал-Кавказстатны билдириуюне кёре, былтыр Къабарты-Малкъарда тахта кёгетледен 315 минг тонна ёсдюрюлгенди. Аны асламысы (165,8 минг тонна) томатладыла. Экинчи жерде (44,3 минг тонна) нашала барадыла. Буруннгу жыл бла тенглешдиргенде, мюлкле аланы экилеринден 7,6 эм 4,2 процентге аслам ёсдюргендиле.

Башха битимледен, ол санда татлы эмда ачы чибижиледен, турмадан, татлы нартюхден, ашха жараулу хансладан 29 минг тоннадан артыкъ ёсдюрюлгенди. Жашил къудоруну бла хобустаны тирликлери уа 24,3 эм 23,7 мингишер тоннагъа жетгенди. Сагъынылгъан продукцияны бир кесеги консерва заводлагъа ётдюрюледи.

Саулай айтханда, быйыл быллай кёгетле, былтырча, 15,4 минг гектарда ёсдюрюллюкдюле. Тергеулеге кёре, тирлик озгъан жылдан осал боллукъ тюйюлдю.

                   Жемиш бахчаланы саны кёбейе барады

Кёпжыллыкъ битимлени эмда терк айныгъан терек бахчаланы къурау жаны бла бизни республика саулай къыралда алчыладан бириди. Ма шёндю да, кюн тохташханы бла, терек бахчалада да иш башланнганды. Быйыл республикада эм азындан 1,5 минг гектар жерде терекле салынырыкъдыла. Эл мюлк министерствода айтханларына кёре, 280 гектарда иш тамам этилгенди.

«Къабарты-Малкъарда асламысында алма, кертме, эрик, балли ёсдюрюучюдюле. Арт жыллада мюлкледе шаптал, нектарин, кёкшуу, наныкъ, жилек да жайылып башланнгандыла. Саулай айтханда, былтыр жемишледен бла жипекледен 535,5 минг тонна жыйылгъанды. Аны бла мюлкле буруннгу жылны кёрюмдюсюн 3,5 процентге артыгъы бла толтургъандыла. Быллай продукция бла биз республиканы толусунлай жалчытабыз, артыгъын а тыш регионлагъа жиберебиз. Аны бла импортну алышындырыу борчну да тындырабыз. Быйыл да тирлик жаны бла умутларыбыз игидиле», - дегенди КъМР-ни эл мюлк министри Хасан Сижажев.

                        Малланы жайлыкълагъа хазырлау

Малланы жайлыкълагъа чыгъаргъанда, ветеринар-санитар жаны бла жорукъланы унутмазгъа чакъырадыла Россельхознадзорну Шимал Кавказда регионла аралы управлениясында. Ведомствода айтханларыча, биринчиден, малладан къанны алып, лабораториягъа жиберирге керекди.

Регионну ветеринария службасы дарман салыуну бардырыргъа борчлуду. Малланы жайлыкъгъа чыгъарырдан алгъа, юслерине къарап, губулары бар эселе, аланы къурутургъа керекди. Туякъларына да кёз жетдирип, терсине ёсген жерлерин кесип кетерирге, тазаларгъа да тийишлиди.

Малны тамгъасы жокъ эсе – аны салыргъа керекди. Сюрюучю да жанында ветеринар препаратла тутаргъа борчлуду.

Исси кюнледе малланы ачыкъ, аяз болгъан жерледе тутса игиди. Аланы хар кюн жангы жерлеге сюрюп, арытып турургъа керекмейди, башха жерге чыгъармай амал жокъ эсе уа, бир суткагъа 10-15 километрден кёпге элтирге жарамайды. Жайлыкъда, къош салырдан алгъа малла суугъа жетерча аллай жер сайлауну сагъышын этерге тийишлиди.

 

 

Омарланы Мурат хазырлагъанды.
Поделиться: