Сынау – Аллахдан келген жорукъду

Саулукъну бла сау-эсенлик бизге уллу саугъа болгъанларын кёпле ангыламайдыла. Биз анга жаланда аурусакъ  тюшюнебиз.   Алай ауруу да Аллахуталадан келген ахшылыкъды, аны хайырындан адамны гюняхлары кечиледиле.

  Мухамамад файгъамбар, Аллахны саламы анга болсун, былай дегенди: «Муслийманнга ауруу, аныча башха азап, термилиу берилсе, Аллахутала аланы хайырындан гюнчхларын кетерликди,  терекден чапыракъла акъгъанча» (Муслим. Бухари).

Сынау – Аллахдан келген жорукъду.  Сынау байлыкъда эм жарлылыкъда,  саулугъу аламат болгъан адамда эм  ауругъанда,  биз сюйген эмда кёрюп болмагъан затлада да билинеди.

«Биз аланы аманлыкъ, ахшылыкъ бла да сынагъанбыз - ала тюз жолгъа къайтырламы» (7:168). «Биз сизни ахшылыкъ, аманлыкъ бла да сынарбыз, сукъландырыр, тирилтир ючюн, сиз Бизге къайтырыкъсыз» (21:35). Сыйлы Къуранны бу аятын Ибн Аббас, Аллахутала къулларын   къыйынлыкъ эм ырахматлыкъ, саулукъ эм ауруу, байлыкъ эм факъыралыкъ, эркин этилген  эм харамгъа чыгъарылгъан затла, бойсунуу эм бой салмау, жангылыу эм тюз башчылыкъ этиу бла да сынарыкъды, деп ангылатады.

 Адамгъа сынау берилген эсе, ол эки затны эсинде тутаргъа борчлуду: тёзюмлю, сабыр болургъа эмда анга берилген къадаргъа ыразылыгъын айтыргъа. Ол кезиуде Аллахуталадан саугъа толу боллукъду.

Мухаммад файгъамбарны сахабаларындан бирини аягъы ауругъанды.  Алай ол тарыкъмагъанды, ынчхамагъанды, жаланда ышарып тургъанды. «Санга ауруу тийгенде нек тарыкъмайса?» - деп соргъанларында: «Аны саугъасыны татлылыгъын ангылап, аурутханны, къыйнагъанны унутханма», - деп  жууаплагъанды.

 Алай адам аурургъа термилирге керекмейди. Ийманы болгъан  бизни Жаратхандан ауруу, къыйналыу тилерге эркин тюйюлдю. Хадисде былай айтылады: «Аллахуталадан кечмеклик, ахшылыкъла тилегиз, кертиди, бир адам да  сау-эсенликча уллу ахшылыкъны сынарыкъ тюйюлдю, иймандан сора».

Шейх Ибн Теймийа былай айтханды: «Сайлаусуз берилген  къыйынлыкълада: ауруу, ёлюм, ырысхысын урлатыу дегенча, адам улу тёзюмлюлюкню, сабырлыкъны кёргюзтсе,  гюняхлары кечиледиле. Аллахуталадан саугъа сынауланы кеслери ючюн этилмейди».

Аллахуталадан муслийманлагъа саулукъ, эсенлик, ырахматлыкъ  тилейбиз. Не сынаулада, къыйынлыкълада, къайгъылада да жаланда бизни Жаратханны ыразылыгъын алыргъа термилебиз.   

 

Тикаланы Фатима хазырлагъанды.
Поделиться: